కరోనా మహమ్మారి దెబ్బకు ఆర్థిక వ్యవస్థలు కుప్పకూలుతున్నాయి. వ్యాపారాలు మూతపడుతున్నాయి. ఈ సంక్షోభంలో నష్టాలు ఎదుర్కొంటున్న కారణంగా 13 శాతం మంది సిబ్బందిని తొలగిస్తున్నట్లు తెలిపింది ఆన్లైన్ ఫుడ్ డెలివరీ సంస్థ జొమాటో. మిగతా సిబ్బంది వేతనాల్లోనూ 50 శాతం వరకూ కోతలు తప్పవని వెల్లడించింది.
కరోనా సంక్షోభం కారణంగా ఊహించని నష్టాలను చవిచూస్తున్నట్లు చెప్పారు జొమాటో సీఈవో దీపిందర్ గోయల్.
" మహమ్మారి కారణంగా నష్టాలు ఎదుర్కొంటున్నాం. ఉద్యోగులను తొలగించక తప్పని పరిస్థితి ఏర్పడింది. రాబోయే కాలంలో 600 మంది సిబ్బందిని తగ్గించుకుంటాం. సీనియర్ ఉద్యోగుల జీతాల్లోనూ 50 శాతం వరకూ కోత విధిస్తాం. సంస్థపై భారం తగ్గించుకునేందుకే ఈ చర్యలు తీసుకుంటున్నాం" అని దీపిందర్ స్పష్టం చేశారు.
గత రెండు నెలల్లో ఊహించని మార్పులు చోటుచేసుకున్నాయని వెల్లడించారు గోయల్. పరిస్థితులు అత్యంత దయనీయంగా మారాయన్నారు. ఇప్పుడు వస్తున్న మార్పులు శాశ్వతంగా ఉంటాయని వివరించారు. ఉద్యోగులను తొలిగించిన విషయం వారికి జూమ్ వీడియో కాల్ ద్వారా తెలియజేస్తామని, ఇతర సంస్థల్లో అవకాశాలు వచ్చేలా చూస్తామని చెప్పారు.
సంస్థ నష్టాల్లో ఉన్న కారణంగా వ్యయాన్ని తగ్గించుకోనున్నట్లు.. మార్చిలోనే సూచన ప్రాయంగా తెలిపారు గోయల్. అనంతరం వందలాది మంది జొమాటో ఉద్యోగులు స్వచ్ఛందంగా వేతనాలు తగ్గించుకున్నారు. రాబోయే 6 నుంచి 12 నెలల్లో 25 నుంచి 40 శాతం రెస్టారెంట్లు మూతపడే అవకాశాలున్నాయాని గోయల్ చెప్పారు. జొమాటోకు ప్రపంచవ్యాప్తంగా 150కి పైగా కార్యాలయాలున్నాయి.