ఫలించిన ప్రభుత్వ చర్యలు.. ఉల్లి ధరలు తగ్గుముఖం!

ఉల్లి ఎగుమతులపై నిషేధం విధిస్తూ కేంద్రం తీసుకున్న నిర్ణయంతో ధరలు తగ్గుముఖం పట్టాయి. ముఖ్యంగా ఆసియాలో అతిపెద్ద ఉల్లి హోల్​సేల్​ మార్కెట్​ అయిన లాసల్​గావ్(మహారాష్ట్ర)లో కిలో ఉల్లి ధర రూ.30 దిగువకు చేరింది.

ఆసియాలోనే అతిపెద్ద ఉల్లి మార్కెట్​గా పేరున్న మహారాష్ట్రలోని లాసల్​గావ్​లో హోల్​సేల్​ ఉల్లి ధరలు భారీగా తగ్గాయి. ప్రస్తుతం కిలో ఉల్లి ధర ఇక్కడ రూ.30 దిగువకు చేరింది. దేశంలో ఉల్లి లభ్యత పెంచేందుకు.. ఎగుమతులపై నిషేధం విధిస్తూ ప్రభుత్వం నిర్ణయం తీసుకున్న నేపథ్యంలో ధరలు తగ్గుముఖం పట్టాయి.
నాసిక్ జిల్లాలో ఉన్న లాసల్​గావ్ మార్కెట్లో సెప్టెంబర్​లో పెరిగిన డిమాండుతో కిలో ఉల్లి ధర రూ.51 దాటింది. జాతీయ హార్టికల్చర్​ పరిశోధన, అభివృద్ధి సంస్థ గణాంకాల్లో ఈ విషయం వెల్లడైంది.

లాసల్​గావ్​ ఉల్లి ధరలకు ఎందుకంత ప్రాముఖ్యం?

దేశంలోని ప్రధాన ప్రాంతాలకు లాసల్​గావ్ మార్కెట్​ నుంచే ఎక్కువగా ఉల్లి సరఫరా అవుతుంది. ఇక్కడ ఉల్లి ధరల్లో ఉండే హెచ్చుతగ్గులు దేశవ్యాప్తంగా ప్రభావం చూపుతాయి. లాసల్​గావ్ వ్యవసాయోత్పత్తుల మార్కెట్​ కమిటీ ప్రకారం.. గురువారం కిలో ఉల్లి ధర స్థానిక మార్కెట్లో గరిష్ఠంగా రూ. 30.20 వద్ద ఉంది. కనీస మద్దతు ధర రూ.15గా ఉంది.

ఆగస్టు నుంచి పెరుగుతున్న ఉల్లి ఘాటు..

మహారాష్ట్రలో ఆగస్టులో కురిసిన భారీ వర్షాల కారణంగా.. మార్కెట్లో ఉల్లి లభ్యత తగ్గి ధరలు భారీగా పెరిగాయి. ఖరీఫ్​ సీజన్​​ ఉత్పత్తి క్షీణించడం ధరల పెరుగుదలకు మరో కారణమైంది.

ఈ ప్రభావంతో దిల్లీ సహా దేశంలోని పలు ప్రాంతాల్లో ఉల్లి ధరలు కిలోకు రూ.60-70 దాటాయి. ఉల్లి ఘాటుకు బెంబేలెత్తిన ప్రజలు ధరలు తగ్గించాలని ప్రభుత్వంపై ఒత్తిడి పెంచారు. ఈ నేపథ్యంలో ఉల్లి ధరల కట్టడికి కేంద్రం చర్యలు ప్రారంభించింది. ఇందులో భాగంగా నిల్వలు పెంచడం, ఎగుమతులపై ఆంక్షలు విధించడం వంటి కీలక నిర్ణయాలు తీసుకుంది.

ఇదీ చూడండి: పసిడి ధరలకు మళ్లీ రెక్కలు- నేడు ఎంత పెరిగిందంటే...