Vodafone idea Fundraise: భారీగా నిధులను సమీకరించాలన్న ప్రముఖ టెలికాం కంపెనీ వొడాఫోన్ ఐడియా ప్రణాళిక విషయంలో ముందడుగు పడింది. మొత్తం రూ.14,500 కోట్లు సమీకరించేందుకు వొడాఫోన్ ఐడియా బోర్డు ఆమోదం తెలిపింది. ఈ మేరకు ఆ కంపెనీ గురువారం తన రెగ్యులేటరీ ఫైలింగ్‌లో పేర్కొంది. ఇందులో రూ.4,500 కోట్లను ప్రమోటర్‌ సంస్థలనుంచి సేకరించనున్నారు.
ఒక్కో షేరును రూ.13.30 ఇష్యూ ప్రైస్‌ వద్ద 10 రూపాయల ముఖ విలువ కలిగిన 338.3 కోట్ల ఈక్విటీ షేర్లను ప్రమోటర్‌ సంస్థలకు విక్రయించనున్నారు. యూరో సెక్యూరిటీస్‌ లిమిటెడ్‌, ప్రైమ్‌ మెటల్‌ లిమిటెడ్‌ (వొడాఫోన్ గ్రూప్‌కు చెందిన సంస్థలు), ఒరియానా ఇన్వెస్ట్‌మెంట్‌ పీటీఈ లిమిటెడ్‌ (ఆదిత్య బిర్లా గ్రూప్‌ సంస్థ)కు ప్రిఫరెన్షియల్‌ బేసిస్‌పై ఈ షేర్లు కేటాయించనున్నట్లు వొడాఫోన్ ఐడియా తన రెగ్యులేటరీ ఫైలింగ్‌లో తెలిపింది. దీని ద్వారా రూ.4,500 కోట్లు సేకరించనున్నారు.