భారత వాణిజ్య భాగస్వామ్యంలో వరుసగా రెండో ఏడాది (2019-20)లోనూ అగ్రరాజ్యం అమెరికానే తొలిస్థానంలో నిలిచింది. ఇది భారత్-అమెరికా దేశాల మధ్య వాణిజ్య సంబంధాలు మరింత మెరుగవుతున్నాయనేందుకు నిదర్శనం.
2019-20 ఆర్థిక సంవత్సరానికి సంబంధించి కేంద్ర వాణిజ్య శాఖ గణాంకాలు విడుదల చేసింది. భారత్, అమెరికాల మధ్య వాణిజ్యం 2018-19 (87.96 బిలియన్ డాలర్లు)తో పోలిస్తే 2019-20 ఆర్థిక ఏడాదిలో 88.75 బిలియన్ డాలర్లకు పెరిగింది.
భారత వాణిజ్యంలో మిగులు కలిగిన దేశాల జాబితాలో అమెరికా ఒకటి. ఇరు దేశాల వాణిజ్య అంతరం 2018-19 (16.86 బిలియన్ డాలర్లు)తో పోలిస్తే 2019-20లో 17.42 బిలియన్ డాలర్లుకు చేరింది.
2018-19 ఆర్థిక ఏడాదిలో చైనాను వెనక్కి నెట్టి భారత వాణిజ్య భాగస్వామ్యంలో అగ్రస్థానాన్ని చేజిక్కించుకుంది అమెరికా.
చైనాతో తగ్గుదల..
భారత్, చైనాల మధ్య వాణిజ్యం 2018-19 (87.08బిలియన్ డాలర్లు)తో పోలిస్తే 2019-20లో 81.87 బిలియన్ డాలర్లకు తగ్గింది. ఇరు దేశాల మధ్య వాణిజ్య లోటు 2018-19(53.57 బిలియన్ డాలర్ల)తో పోలిస్తే.. 48.66 బిలియన్ డాలర్లకు తగ్గింది.
భారత్తో వాణిజ్య భాగస్వామ్యంలో 2013-14 నుంచి 2017-18 ఆర్థిక ఏడాది వరకు చైనానే అగ్రస్థానంలో కొనసాగినట్లు గణాంకాలు సూచిస్తున్నాయి. అంతకు ముందు ఆ స్థానంలో యూఏఈ ఉండేది.
సంప్రదాయం కొనసాగింపు...
అమెరికా-భారత్ల మధ్య వాణిజ్య భాగస్వామ్యం బలోపేతానికి ఇరు దేశాలు కృషి చేస్తున్న నేపథ్యంలో.. వాణిజ్య విస్తరణ వచ్చే సంవత్సరాల్లోనూ కొనసాగుతుందని నిపుణులు అభిప్రాయపడుతున్నారు. అమెరికాలోని భారతీయులు కూడా ఇందుకు ఒక కారణంగా పేర్కొన్నారు జేఎన్టీయూలోని ఆర్థికశాస్త్రం ప్రొఫెసర్ బిస్వజిత్ ధార్.
" అమెరికాలో ఎక్కువ శాతం భారతీయులు ఉండటం దేశీయ వస్తువులకు డిమాండ్ను పెంచుతోంది. వాటిని మనం సరఫరా చేస్తున్నాం. సమతుల్య వాణిజ్య ఒప్పందం ఆర్థిక సంబంధాలనూ మరింత మెరుగుపరుస్తుంది."
- బిస్వజిత్ ధార్, జేఎన్టీయూ ప్రొఫెసర్.
చైనా వ్యతిరేక భావనలతో..
భారత్ సహా అమెరికాలోనూ చైనా వ్యతిరేక భావన పెరగటం వల్ల భారత్-అమెరికాల మధ్య ధ్వైపాక్షిక వాణిజ్య బలోపేతానికి మరింత ఆస్కారం లభిస్తోందని అభిప్రాయపడ్డారు లుథియానా ఆధారిత చేతి వృత్తుల సమాఖ్య అధ్యక్షుడు సుభాష్ చందర్ రల్హాన్. అమెరికా కంపెనీలు చైనాపై ఆధారపడటాన్ని తగ్గించేందుకు భారత్ వంటి దేశాలవైపు చూస్తున్నాయని, అదే జరిగితే అమెరికాకు ఎగుమతులు పెంచడానికి ఉపయోగపడుతుందని వెల్లడించారు.
పన్ను మినహాయింపులపై..
అమెరికా వీసా నిబంధనల్లో సడలింపులు, ఉక్కు, అల్యూమినియం ఉత్పత్తులపై అధిక పన్నులను తగ్గించటం సహా వ్యవసాయ, ఆటోమొబైల్, ఇంజినీరింగ్ ఉత్పత్తులకు మార్కెట్ కల్పించాలని కోరుతోంది భారత్..
మరోవైపు.. తమ వ్యవసాయ, తయారీ ఉత్పత్తులు, డైరీ వస్తువులు, మెడికల్ పరికరాలకు విస్తృతమైన మార్కెట్ కల్పించటంతో పాటు సమాచార, సాంకేతిక ఉత్పత్తులపై దిగుమతి సుంకాలను తగ్గించాలని కోరుతోంది అమెరికా.
ఇదీ చూడండి: కరోనాతో మారిన లెక్క- సర్కారీ కొలువే శ్రీరామ రక్ష!
