ప్రధానమంత్రి నరేంద్ర మోదీ అమెరికా పర్యటనపై అక్కడి కార్పొరేట్ వర్గాలు భారీ ఆశలు పెట్టుకున్నాయి. భారత్-అమెరికా ద్వైపాక్షిక బంధాలు బలోపేతమై, వాణిజ్య ఒప్పందాలు వేగవంతమవుతాయని ఆశిస్తున్నాయి. ట్రంప్ విధానాల వల్ల ప్రస్తుతం ఇరుదేశాల మధ్య వాణిజ్య బంధం ఒడుదొడుకుల్లో ఉంది.
"మోదీ పర్యటన నేపథ్యంలో భారత్-అమెరికాల మధ్య వాణిజ్య బంధం బలోపేతం అవుతుందని ఆశిస్తున్నాం."
- నిషా దేశాయ్ బిస్వాల్, యూఎస్ ఇండియా బిజినెస్ కౌన్సిల్ అధ్యక్షురాలు
హౌడీ-మోదీ
నేడు అమెరికాలోని హ్యూస్టన్లో నిర్వహించే హౌడీ మోదీ కార్యక్రమంలో పాల్గొంటారు ప్రధాని. ఈ కార్యక్రమానికి అమెరికా అధ్యక్షుడు డొనాల్డ్ ట్రంప్ కూడా హాజరుకానున్నారు. సుమారు 50 వేల మంది ప్రవాస భారతీయులను ఉద్దేశించి ఇరువురు నేతలు ప్రసంగించనున్నారు. ఇది ఇరుదేశాలు ఒకరిపై ఒకరు ఆధారపడిన విషయాన్ని తెలియజేస్తోంది. ఈ నేపథ్యంలో భారత్-అమెరికాల మధ్య ద్వైపాక్షిక, వాణిజ్య సంబంధాలు బలోపేతం అవుతాయని కార్పొరేట్ వర్గాలు భావిస్తున్నాయి.
యూఎస్ ఛాంబర్ ఆఫ్ కామర్స్
యూఎస్ ఛాంబర్ ఆఫ్ కామర్స్లో భాగమైన యూఎస్ఐబీసీ.. భారత్లోని అమెరికన్ కంపెనీలకు ప్రాతినిధ్యం వహిస్తోంది. ఇది ఇరుదేశాల మధ్య ద్వైపాక్షిక వాణిజ్య సంబంధాల కోసం విశేష కృషి చేస్తోంది.
"మూడు రోజుల వ్యవధిలో మోదీ, ట్రంప్ రెండోసారి న్యూయార్క్లో కలిసే సమయానికి భారత్-అమెరికా మధ్య వాణిజ్య వివాదాలు పరిష్కారమవుతాయని ఆశిస్తున్నాం."- ముఖేష్ ఆగి, యూఎస్ఐఎస్పీఈ
చమురు రాజధానిలో
ప్రపంచంలోని చమురు రాజధానుల్లో హ్యూస్టన్ ఒకటి. సౌదీ చమురు క్షేత్రాలపై డ్రోన్ దాడులు, ఇరాన్పై అమెరికా ఆంక్షలతో ప్రస్తుతం గల్ఫ్ తీరంలో ఉద్రిక్తతలు కొనసాగుతున్నాయి. ఫలితంగా భారత్కు చమురు ఓ పెద్ద సమస్యగా మారింది. అందుకే చమురు కోసం అమెరికా వైపు చూస్తోంది. ఈ నేపథ్యంలో ఇంధన, గ్యాస్ కంపెనీల సీఈఓలతో రౌండ్ టేబుల్ సమావేశం నిర్వహించబోతున్నారు.
2020 అమెరికా అధ్యక్ష ఎన్నికల్లో ట్రంప్ పోటీ చేస్తున్నారు. ఆయనకు హ్యూస్టన్, టెక్సాస్ల్లో ప్రవాస భారతీయుల ఓట్లు చాలా అవసరం. అందువల్ల ఇరుదేశాల మధ్య చమురు ఒప్పందాలు కుదిరే అవకాశం ఉందని కార్పొరేట్ వర్గాలు భావిస్తున్నాయి.
అంతరిక్షం, జీవశాస్త్ర రంగాల్లోనూ హ్యూస్టన్ది ప్రముఖ స్థానం. ఇది కూడా భారత్కు కలిసివచ్చే అంశమే.
వాణిజ్యం.. మరింత ముందుకు
అమెరికాలో రెండో అతిపెద్ద ఆర్థిక వ్యవస్థగా టెక్సాస్ ఉంది. టెక్సాస్ కేంద్రంగా పనిచేస్తున్న 28 కంపెనీలు .. భారత్లో 69 వరకు అనుబంధ సంస్థలను కలిగి ఉన్నాయి. వీటిని మరింత విస్తృతం చేయాలని మోదీ భావిస్తున్నారు. ఫలితంగా ఉపాధి, ఉత్పాదకత, సేవల రంగం అభివృద్ధి చెందుతుందని మోదీ ఆశిస్తున్నారు.
ఇదీ చూడండి:వినియోగదారులకు ఇక బ్యాంకులే ఫైన్ కడతాయి!
