New IT Rules: ట్విట్టర్​కు హైకోర్టు షాక్!

నూతన ఐటీ నిబంధనలు ట్విట్టర్ పాటించాల్సిందేనని దిల్లీ హైకోర్టు స్పష్టం చేసింది. ఈ నియమాలను ట్విట్టర్ పాటించడం లేదంటూ దాఖలైన పిటిషన్​పై విచారణ చేపట్టిన న్యాయస్థానం.. ఆ సంస్థతో పాటు కేంద్ర ప్రభుత్వానికి నోటీసులు జారీ చేసింది.

డిజిటల్ మీడియా కోసం కేంద్రం రూపొందించిన నియమాలను ట్విట్టర్ పాటించాల్సిందేనని దిల్లీ హైకోర్టు(Delhi High Court) స్పష్టం చేసింది. ట్విట్టర్(Twitter) సంస్థ నిబంధనలు పాటించడం లేదని అమిత్ ఆచార్య అనే న్యాయవాది దాఖలు చేసిన పిటిషన్​పై విచారణ జరిపిన కోర్టు.. ఈ అంశంపై వైఖరి తెలపాలని కేంద్ర ప్రభుత్వంతో పాటు ట్విట్టర్​కు నోటీసులు జారీ చేసింది.

భిన్నవాదనలు

కాగా, నూతన ఐటీ నిబంధనల(new IT rules)ను పాటిస్తున్నట్లు ట్విట్టర్ పేర్కొంది. స్థానిక ఫిర్యాదు పరిష్కార అధికారిని సైతం నియమించినట్లు న్యాయస్థానానికి వెల్లడించింది.

అయితే ఈ ప్రకటనను కేంద్రం తప్పుబట్టింది. ఐటీ నిబంధనలకు అనుగుణంగా ట్విట్టర్​ నడుచుకోవడం లేదని ప్రభుత్వ తరపు న్యాయవాది రిపుదమన్ సింగ్ భరద్వాజ్ పేర్కొన్నారు. ట్వీట్లకు సంబంధించి ఫిర్యాదులు పరిష్కరించేందుకు అధికారిని ఇంతవరకు నియమించలేదని అన్నారు.

రెండు ట్వీట్లకు సంబంధించి ఆ సంస్థకు ఫిర్యాదు చేసేందుకు ప్రయత్నించినట్లు పిటిషనర్ ఆచార్య పేర్కొన్నారు. అప్పుడే ఈ నిబంధనలు పాటించడం లేదన్న విషయం బయటపడిందని కోర్టుకు తెలిపారు. ఈ నేపథ్యంలో ఫిర్యాదు పరిష్కార అధికారిని వెంటనే నియమించేలా ట్విట్టర్​కు ఆదేశాలు జారీ చేయాలని న్యాయస్థానాన్ని కోరారు.

ఇవీ చదవండి-