ట్రూకాలర్​తో భారతీయ రైల్వే డీల్.. ప్రయాణికులకు లాభాలివే...

ప్రయాణికులకు కచ్చితత్వం, పారదర్శకతతో కూడిన సమాచారం అందించేందుకు భారతీయ రైల్వే..(Indian Railways News) ట్రూకాలర్ యాప్​తో భాగస్వామ్యం కుదుర్చుకుంది. ఈ విషయాన్ని ఐఆర్​సీటీసీ ఎండీ రజనీ హసీజా తెలిపారు. రైల్వే హెల్ప్​లైన్​ నంబర్​ 139ను ఇకపై ట్రూ కాలర్ వెరిఫికేషన్​ చేస్తుందన్నారు.

రైల్వే టికెట్స్ బుకింగ్, ప్రయాణ వివరాలు, తదితర అంశాల్లో ప్రయాణికులకు మరింత భరోసా, పారదర్శకతతో కూడిన సమాచారం అందించేందుకు భారతీయ రైల్వే(Indian Railways News) మరో అడుగు ముందుకు వేసింది. ట్రూ కాలర్ యాప్​తో భాగస్వామ్యం కుదుర్చుకుంది. రైల్వే హెల్ప్​లైన్ నంబర్ 139ను ఇకపై ట్రూ కాలర్ వెరిఫై చేయనుంది. 139 హెల్ప్​లైన్​కు కాల్, మెసేజెస్​​ చేసినప్పుడు వాటికి వెరిఫైడ్​ అనే గ్రీన్ బ్యాడ్జ్ వస్తుంది. ఫలితంగా.. తమకు ఐఆర్​సీటీసీ నుంచే సమాచారం అందుతోందన్న నమ్మకం ప్రయాణికులకు కలుగుతుంది.

" ట్రూ కాలర్​తో జతకట్టినందుకు మేం సంతోషం వ్యక్తం చేస్తున్నాం. ప్రయాణికులకు ఐఆర్​సీటీసీ వెబ్​సైట్ ద్వారా కచ్చితమైన, పారదర్శకతతో కూడిన సమాచారాన్ని అందించేందుకు మేము ట్రూ కాలర్​తో భాగస్వామ్యం అయ్యాం. రైల్వే హెల్ప్​లైన్ నంబర్ 139ను ఇకపై ట్రూ కాలర్ వెరిఫికేషన్​ చేయనుంది."

-- రజనీ హసీజా, ఐఆర్​సీటీసీ ఛైర్మన్ అండ్ ఎండీ

ఐఆర్​సీటీసీతో(IRCTC News) కలిసి పనిచేసేందుకు తాము ఎంతో ఆసక్తితో ఉన్నామని ట్రూ కాలర్ ఇండియా ఎండీ రిషిత్ ఝన్​ఝున్​వాలా తెలిపారు.

ఐఆర్​సీటీసీ(IRCTC News).. రైల్వే హెల్ప్​లైన్ నంబర్​ 139 సేవలను 2007లో ప్రారంభించింది. రోజుకు దాదాపు 2లక్షల కాల్స్ ఈ నంబర్​కు వస్తాయి. రైలు ప్రయాణానికి సంబంధించిన పూర్తి వివరాలను ఈ నంబర్​ ద్వారా తెలుసుకోవచ్చు.

ఇదీ చదవండి:భారతీ ఎయిర్‌టెల్​కు సుప్రీంకోర్టు షాక్!