రివ్యూ 2019: ఏడాదిలో ఇంత డేటా వాడేశామా!

దేశంలో ఇంటర్నెట్ వినియోగం భారీగా పెరిగినట్లు తెలుస్తోంది. 2014లో 828 మిలియన్ల​ జీబీగా ఉన్న డేటా వినియోగం.. ఈ ఏడాది తొలి 9 నెలల్లో 54,917 మిలియన్ల జీబీకి పెరిగినట్లు అధికారిక గణాంకాలు చెబుతున్నాయి. ఈ స్థాయిలో డేటా వినియోగం పెరిగేందుకు ట్రాయ్​ చెబుతున్న కారణాలు ఇవే...

భారత్‌లో ఈ ఏడాది ఇంటర్నెట్​ డేటాను భారీఎత్తున వినియోగించినట్లు టెలికాం నియంత్రణ సంస్థ 'ట్రాయ్'​ తెలిపింది. సెప్టెంబర్‌ వరకు విడుదలైన సమాచారం ప్రకారం 54,917 మిలియన్ల జీబీ డేటాను వినియోగించినట్లు తెలుస్తోంది.

2014లో 828 మిలియన్ల జీబీ డేటా మాత్రమే వినియోగించగా.. 2018 నాటికి ఇది 46,404 మిలియన్ల జీబీకి చేరింది. 2019లో ఇప్పటివరకు వచ్చిన లెక్కలను చూస్తేనే గత ఏడాది డేటాను ఎప్పుడో దాటేసింది.

వైర్​లెస్​ డేటా వినియోగులు ఇలా..

వైర్‌లెస్‌ ఇంటర్నెట్‌ వినియోగించే వారి సంఖ్య 2014లో 281.58 మిలియన్లు ఉండగా.. 2019 సెప్టెంబర్‌ నాటికి 664.80 మిలియన్లకు చేరింది. 2017కు 2018కి వీరి సంఖ్య దాదాపు 36.36శాతం పెరిగింది. 2017లో డేటా వినియోగం కంటే 2018లో డేటా వినియోగం రెట్టింపు కావడం విశేషం. 2016కు డేటా వినియోగం 4642గా మాత్రమే ఉందని ట్రాయ్ నివేదికలో పేర్కొంది.

డేటా వినియోగం పెరిగేందుకు కారణాలివే..

ఈ నాలుగేళ్లలో వైర్‌లెస్‌ డేటా వినియోగం ఊహకందని స్థాయిలో పెరిగిపోయిందని ట్రాయ్‌ అభిప్రాయపడింది. 4జీ రాకతో నెమ్మదిగా ఆ సాంకేతికత ఉన్న పరికరాలూ పెరగడం ఇంటర్నెట్‌ డేటా వినియోగం భారీ పెరిగేందుకు దోహదపడిందని పేర్కొంది.

అయితే 2016లో జియో మార్కెట్లోకి వచ్చిన తర్వాత.. డేటా ఛార్జీలు భారీగా తగ్గి వైర్​లెస్​ డేటా వినియోగం ఈ స్థాయిలో పెరిగినట్లు టెలికాం నిపుణులు చెబుతున్నారు.

ఈ క్రమంలో దేశంలోని చాలా ప్రాంతం 2జీ నుంచి 4జీకి అప్‌గ్రేడ్‌ కావడం కీలక పాత్ర పోషించింది. తక్కువ ధరలకే స్మార్ట్​ఫోన్లు లభించడం కారణంగా డేటా వినియోగించే వారి సంఖ్య భారీ స్థాయిలో పెరిగింది.

ఇదీ చూడండి:వచ్చే ఏడాది బ్యాంకుల సెలవులు ఇవే!