అమెజాన్​, ఫ్లిప్​కార్ట్​లపై వ్యాపారుల 'నిరసన' గళం

అమెజాన్​, ఫ్లిప్​కార్ట్​లను నిషేధించాలని డిమాండ్​ చేస్తూ అఖిల భారత వ్యాపారుల సమాఖ్య.. జాతీయ నిరసన దినాన్ని నిర్వహించింది. ఈ రెండు ఈ-కామర్స్ సంస్థలు అనైతిక వాణిజ్య పద్ధతులను అవలంబిస్తున్నాయని ఆరోపించింది. ప్రభుత్వ ఎఫ్​డీఐ విధానాన్ని బహిరంగంగా ఉల్లంఘిస్తున్నాయని, ఫలితంగా ఈ-కామర్స్ విపణి విషపూరితమైందని మండిపడింది.

ప్రముఖ ఈ-కామర్స్​ సంస్థలు అమెజాన్, ఫ్లిప్​కార్ట్​లను నిషేధించాలని డిమాండ్​ చేస్తూ దేశీయ వాణిజ్య సంఘాలు బుధవారం 'జాతీయ నిరసన దినాన్ని' నిర్వహించాయి. దేశవ్యాప్తంగా సుమారు 700 నగరాల్లో నిర్వహించిన ఆందోళనల్లో లక్షలాది వ్యాపారులు పాల్గొన్నారు.

"అమెజాన్​, ఫ్లిప్​కార్ట్​... 'అనైతిక వాణిజ్య పద్ధతులను' అవలంబిస్తున్నాయి. ప్రభుత్వ ఎఫ్​డీఐ విధానాన్ని బహిరంగంగా ఉల్లంఘిస్తున్నాయి. ఫలితంగా భారత ఈ-కామర్స్ విపణి అత్యంత విషపూరితమైంది. ప్రభుత్వం ఈ రెండు ఈ-కామర్స్ సంస్థలను వెంటనే నిషేధించాలి."- అఖిల భారత వ్యాపారుల సమాఖ్య (సీఏఐటీ)

అభ్యంతరం ఏంటంటే...

అమెజాన్, ఫ్లిప్​కార్ట్ భారత్​లో వ్యాపారం చేయడంపై తమకు అభ్యంతరం ఏమీ లేదన్నారు సీఏఐటీ అధ్యక్షుడు బీసీ భర్టియా. అయితే వ్యాపారుల తరహాలో ఈ సంస్థలు కూడా ప్రభుత్వ ప్రత్యక్ష విదేశీ పెట్టుబడులు (ఎఫ్​డీఐ) విధానాన్ని, ఇతర పన్ను చట్టాలని కచ్చితంగా అనుసరించాలని ఆయన స్పష్టం చేశారు. చట్టాలను పాటించే వరకు ఈ రెండు సంస్థలను నిషేధించాలని డిమాండ్ చేశారు.

అమెజాన్, ఫ్లిప్​కార్ట్​ల వ్యాపార నమూనాలు, వాటి ఖాతాలు, విదేశీ పెట్టుబడులు, వాటి ఉత్పత్తుల పంపిణీ తదితర అంశాలపై సమగ్ర దర్యాప్తు జరపాలని కూడా సీఏఐటీ డిమాండ్ చేసింది.

ఇదీ చూడండి:వాట్సాప్​ను వెంటనే అప్​డేట్​ చేసుకోండి.. లేదంటే అంతే!