కరోనాతో బ్యాంకింగ్‌ రంగంలో 1,200 మంది మృతి!

దేశవ్యాప్తంగా కరోనా తీవ్ర స్థాయిలో విజృంభిస్తున్నా.. అత్యవసర సేవల కింద బ్యాంకులు నిరంతరాయంగా పని చేస్తున్నాయి. ఈ కారణంగా బ్యాంకు ఉద్యోగులు పెద్ద సంఖ్యలో కరోనా బారిన పడుతున్నారు. ఈ మహమ్మారి వల్ల ఇప్పటి వరకు 1,200 మంది బ్యాంకింగ్ రంగ​ ఉద్యోగులు మృత్యువాత పడినట్లు అఖిల భారత బ్యాంకు అధికారుల సమాఖ్య వెల్లడించింది.

కరోనా మహమ్మారి ఏ స్థాయిలో విజృంభిస్తున్నప్పటికీ.. కొన్ని రంగాలు మాత్రం తమ సేవల్ని నిరంతరాయంగా కొనసాగిస్తున్నాయి. అందులో బ్యాంకింగ్‌ రంగం ఒకటి. బ్యాంకు ఉద్యోగులపై కరోనా తీవ్ర ప్రభావం చూపుతోందని ఇండస్ట్రీ వర్గాలు తెలిపాయి. ఇప్పటి వరకు వెయ్యి మందికి పైగా ఉద్యోగులు కరోనా కారణంగా ప్రాణాలు కోల్పోయినట్లు 'అఖిల భారత బ్యాంకు అధికారుల సమాఖ్య' ప్రధాన కార్యదర్శి ఎస్‌.నాగరాజన్‌ తెలిపారు. బ్యాంకు ఉద్యోగులు ఫ్రంట్‌లైన్ వర్కర్లని.. వారిని మహమ్మారి కబళిస్తోందని ఆవేదన వ్యక్తం చేశారు.

దేశంలో కరోనా భారీస్థాయిలో విజృంభిస్తున్న విషయం తెలిసిందే. ఈ నేపథ్యంలో దాదాపు అన్ని రాష్ట్రాలు పూర్తిస్థాయి లేదా పాక్షిక లాక్‌డౌన్లు విధించాయి. కానీ, అత్యవసర రంగంలో ఉన్న బ్యాంకులు మాత్రం యథావిధిగా పనిచేస్తున్నాయి. 50 శాతం సిబ్బందితో పనిచేయడం, పనివేళల్లో కొన్ని సడలింపులు కల్పించినప్పటికీ.. సేవల్ని మాత్రం నిరంతరంగా కొనసాగిస్తున్నారు. ఈ నేపథ్యంలోనే అనేక మంది ఉద్యోగులు మహమ్మారి బారిన పడుతున్నారు.

దీనిపై ‘అఖిల భారత బ్యాంకు ఉద్యోగుల సమాఖ్య’ ప్రధాన కార్యదర్శి సి.హెచ్‌.వెంకటాచలం మాట్లాడారు. ఇప్పటి వరకు 1,200 మంది ఉద్యోగులు మరణించినట్లు తెలిపారు. ఇంకా అనేక మంది కొవిడ్‌తో బాధపడుతున్నట్లు వెల్లడించారు. మరోవైపు కరోనా బారిన పడ్డ ఉద్యోగులు, మరణించిన వారి వివరాల్ని పంచుకోవడానికి అనేక బ్యాంకులు ముందుకు రావడం లేదని పేర్కొన్నారు. అలాగే మరణించిన వారి కుటుంబాలకు ఇవ్వాల్సిన పరిహారంపై కూడా సరైన విధివిధానాలను ప్రకటించడం లేదని విచారం వ్యక్తం చేశారు.

మరోవైపు బ్యాంకు, బీమా సంస్థల ఉద్యోగులందరికీ టీకా ఇవ్వడంలో ప్రాధాన్యం ఇవ్వాలని కోరుతూ ఇటీవలే కేంద్ర ప్రభుత్వ ఉన్నతాధికారి దెబాశిష్‌ పాండే రాష్ట్ర ప్రభుత్వాలకు లేఖ రాశారు.

ఇదీ చదవండి:బిల్​గేట్స్ జీవితంలో చీకటి కోణం... అందుకే అలా...