తత్కాల్ టికెట్ల జారీని అడ్డుకునే అక్రమ సాఫ్ట్వేర్లపై రైల్వే శాఖ ఉక్కుపాదం మోపింది. వాటిని నియంత్రిస్తున్న 60 మంది ఏజెంట్లను రైల్వే రక్షణ దళం(ఆర్పీఎఫ్) అరెస్టు చేసింది. అక్రమ సాఫ్ట్వేర్లకు అడ్డుకట్ట వేసేందుకు తీసుకున్న చర్యలతో ప్రయాణికులకు మరిన్ని తత్కాల్ టికెట్లు లభించనున్నాయి.
ఈ సాఫ్ట్వేర్లను తొలగించడం వల్ల ఇప్పటివరకు బుకింగ్ ప్రారంభమైన నిమిషాల్లోనే కనుమరుగవుతూ వస్తున్న తత్కాల్ టికెట్లు.. కొన్ని గంటల పాటు అందుబాటులో ఉండే అవకాశం ఉందని ఆర్పీఎఫ్ డైరెక్టర్ జనరల్ అరుణ్ కుమార్ స్పష్టం చేశారు.
రైల్వే టికెట్ బుకింగ్ ప్రక్రియలో భాగంగా ఐఆర్సీటీసీ లాగిన్, బ్యాంక్ ఓటీపీ వంటి స్టేజీలను ఈ అక్రమ సాఫ్ట్వేర్లు అధిగమించి టికెట్లు బుకింగ్ చేస్తున్నాయని.. సాధారణ ప్రయాణికులు మాత్రం ఈ ప్రక్రియను పూర్తిగా అనుసరించాల్సి వస్తోందని అధికారులు వ్యాఖ్యానించారు. సాధారణ ప్రయాణికులకు 2.55 నిమిషాల బుకింగ్ సమయం పడుతుండగా.. ఈ సాఫ్ట్వేర్లు ఉపయోగించిన వారికి 1.48 నిమిషాల్లోనే బుకింగ్ జరుగుతున్నట్లు చెప్పారు.
"గత రెండు నెలలుగా అక్రమ సాఫ్ట్వేర్ల ద్వారా ఒక్క తత్కాల్ టికెట్ బుకింగ్ జరగలేదు. ఐఆర్సీటీసీ వెబ్సైట్లో ఉన్న సమస్యలను పరిష్కరించాం. అక్రమ సాఫ్ట్వేర్ల ఆపరేటర్లను పట్టుకున్నాం."-అరుణ్ కుమార్, ఆర్పీఎఫ్ డీజీ
అక్రమ సాఫ్ట్వేర్ల వ్యాపారం దాదాపు రూ.50 నుంచి రూ.100 కోట్ల మధ్య ఉన్నట్లు వెల్లడించారు అరుణ్. అరెస్టయిన వారిలో కోల్కతాకు చెందిన ఓ వ్యక్తికి బంగ్లాదేశ్ ఉగ్ర ముఠా 'జమాత్ ఉల్ ముజహిదీన్ బంగ్లాదేశ్'తో సంబంధం ఉన్నట్లు వెల్లడించారు. మరో ఏడుగురికి కూడా ఈ ముఠాతో సంబంధాలు ఉన్నాయని తెలిపారు.
10 గంటలపాటు తత్కాల్ టికెట్లు !
రైల్వే అధికారుల చర్యతో తత్కాల్ టికెట్లు కొన్ని గంటల పాటు అందుబాటులోకి వచ్చాయని అరుణ్ కుమార్ తెలిపారు. 2019 అక్టోబర్ 26న మగధ్ ఎక్స్ప్రెస్ తత్కాల్ బుకింగ్లు కేవలం రెండు నిమిషాల్లోనే ముగిసిపోగా.. 2020 ఫిబ్రవరి 9న ఏకంగా 10 గంటలపాటు అందుబాటులో ఉన్నట్లు పేర్కొన్నారు. అదేవిధంగా 2019 నవంబర్ 16న సంపూర్ణ క్రాంతి ఎక్స్ప్రెస్కు నాలుగు నిమిషాల్లోనే తత్కాల్ బుకింగ్లు జరిగాయి. 2020 ఫిబ్రవరి 8న ఈ టికెట్లు 18 నిమిషాల పాటు అందుబాటులో ఉన్నాయని తెలిపారు. వివిధ జోన్ల పరిధిలోని టికెట్లను పరిశీలిస్తున్నట్లు అరుణ్ తెలిపారు. అక్రమంగా బుకింగ్లు చేసే టికెట్ మానిటరింగ్ సాఫ్ట్వేర్లపై దృష్టి సారించినట్లు వెల్లడించారు.
