36వేల మంది వీధి వ్యాపారులతో స్విగ్గీ ఒప్పందం!

ఇకపై ప్రముఖ ఆన్​లైన్​ ఫుడ్​ డెలివరీ సంస్థ స్విగ్గీ దేశంలోని 36 వేల మంది వీధి వ్యాపారులతో కలిసి పనిచేయనుంది. ప్రధానమంత్రి స్వీయనిధి కింద రుణాలు పొందిన వీధి వ్యాపారులు ఇందులో భాగం కానున్నారు.

ప్రముఖ ఆన్​లైన్​ ఫుడ్​ డెలివరీ సంస్థ స్విగ్గీ ఇకపై వీధి వ్యాపారులతో కలిసి పని చేయనుంది. ఆత్మనిర్భర్​ భారత్​లో భాగంగా దేశంలోని 125 పట్టణాల్లో ఈ సేవలను అందుబాటులోకి తీసుకురానుంది. మొదటిదశలో సుమారు 36వేల చిన్న సంస్థలకు ప్రధానమంత్రి స్వీయనిధి కింద కేంద్ర పట్టణాభివృద్ధి రుణ సౌకర్యం కల్పించింది.

ప్రస్తుతం పైలెట్​ ప్రాజెక్ట్​ కింద కేంద్ర పట్టణాభివృద్ధి శాఖ సహకారంతో అహ్మదాబాద్​, వారణాశి, చెన్నై, దిల్లీ, ఇండోర్​ లాంటి నగరాల్లో 300 మంది వీధి వ్యాపారులతో ఒప్పందం కుదుర్చుకున్నట్లు తెలిపింది. ఇందుకు ముందుగా వ్యాపారులు ఫుడ్​ సేఫ్టీ అండ్​ స్టాండడ్స్​ అథారిటీ ఆఫ్​ ఇండియాలో రిజిస్టర్​ కావడంతో పాటు ఫుడ్​ సేఫ్టీలో శిక్షణ పొందిన ధ్రువపత్రం కూడా ఇందుకు సమర్పించాల్సి ఉంటుంది అని స్పష్టం చేసింది.

వినియోగదారులు కోరిన స్ట్రీట్​ఫుడ్​ను వారి గడప-గడపకు తీసుకురావడం ఎంతో సంతోషంగా ఉంది. వీధి వ్యాపారులను, భోజన ప్రియులను కలపడానికి స్విగ్గీ ఓ వేదిక కానుంది. నాణ్యమైన చిరు తిండిని అందించడానికి కట్టుబడి ఉన్నాం.

- వివేక్​ సుందర్​, స్విగ్గీసీఈఓ