ఫ్లిప్​కార్ట్, పతంజలిని బంద్​ చేస్తామంటూ నోటీసులు

ప్లాస్టిక్ వ్యర్థాల నిర్వహణ నిబంధనలు పాటించనందుకు ఫ్లిప్​కార్ట్, పతంజలి పేయా సంస్థలకు షోకాజ్ నోటీసులు జారీ చేసింది కేంద్ర కాలుష్యనియంత్రణ బోర్డు. కార్యకలాపాలను ఎందుకు నిలిపివేయకూడదో చెప్పాలని వాటిలో పేర్కొంది. వీటితో పాటు మరో నాలుగు సంస్థలకు కూడా నోటీసులు పంపించింది.

ఫ్లిప్​కార్ట్, పతంజలి పేయా కార్యకలాపాలను ఎందుకు నిలిపివేయకూడదో చెప్పాలంటూ ఆ సంస్థలకు షోకాజ్ నోటీసులు జారీ చేసింది కేంద్ర కాలుష్య నియంత్రణ బోర్డు(సీపీసీబీ). ఈ విషయాన్ని జాతీయ హరిత ట్రైబ్యునల్​కు నివేదించింది. సదరు సంస్థలు సీపీసీబీ వద్ద రిజిస్టర్ కాలేదని పేర్కొంది. ప్లాస్టిక్ వ్యర్థాల నిర్వహణ-2018 చట్టం నిబంధనలు పాటించనందుకు పర్యావరణ చట్టం సెక్షన్ 5 ప్రకారం అక్టోబర్ 8న ఈ నోటీసులు జారీ చేసినట్లు తెలిపింది సీపీసీబీ. అయితే.. షోకాజ్ నోటీసులపై ఆయా సంస్థలు స్పందించలేదని తెలిపింది.

హిందుస్థాన్ కోకాకోలా బేవరేజెస్ ప్రైవేట్ లిమిటెడ్, పెప్సికో ఇండియా హోల్డింగ్ ప్రై.లి., బిస్లెరీ ఇంటర్నేషనల్ ప్రై. లి., నౌరిష్​కో బేవరేజెస్ లిమిటెడ్​ సంస్థలు సీపీసీబీ వద్ద రిజిస్టర్ అయ్యాయని వెల్లడించింది. ఎక్స్​టెండెడ్ ప్రొడ్యూసర్ రెస్పాన్సిబిలిటీ(ఈపీఆర్) అమలు కోసం ఎలాంటి ప్రణాళికలను ఈ సంస్థలు అందించలేదని స్పష్టం చేసింది.

ఈ సంస్థలు పంపించిన పత్రాలను రాష్ట్ర కాలుష్య నియంత్రణ బోర్డులు ఆమోదించలేదని సీపీసీబీ వెల్లడించింది. దీనికి అనుగుణంగా ఆయా సంస్థలకు కూడా షోకాజ్ నోటీసులు జారీ చేసినట్లు తెలిపింది.

ఇదీ చదవండి-ఎస్​బీఐ సేవలకు అంతరాయం.. కారణమిదే