మార్కెట్లకు స్వల్ప లాభాలు- 38 వేలపైకి సెన్సెక్స్

అంతర్జాతీయంగా మిశ్రమ సంకేతాల నడుమ స్టాక్ మార్కెట్లు బుధవారం స్వల్ప లాభాలను నమోదు చేశాయి. సెన్సెక్స్ 95 పాయింట్లు బలపడి తిరిగి 38 వేల మార్క్​ను దాటింది. నిఫ్టీ స్వల్పంగా 25 పాయింట్ల లాభంతో ముగిసింది

స్టాక్ మార్కెట్లు బుధవారం స్వల్ప లాభాలతో ముగిశాయి. బీఎస్ఈ-సెన్సెక్స్ 95 పాయింట్లు పుంజుకుని.. 38,068 వద్దకు చేరింది. ఎన్​​ఎస్​ఈ-నిఫ్టీ ఫ్లాట్​గా ముగిసింది. స్వల్పంగా 25 పాయింట్లు పెరిగి 11,247 వద్ద సెషన్​ను ముగించింది.

అంతర్జాతీయంగా మిశ్రమ సంకేతాల నడుమ సూచీలు ఆద్యంతం ఒడుదొడుకులు ఎదుర్కొన్నాయి. ఒకనొక దశలో భారీ లాభాలవైపూ దూసుకెళ్లాయి. ఎఫ్​ఎంసీజీ షేర్లే ఎక్కువగా బుధవారం లాభాలను నమోదు చేశాయి. టెలికాం, లోహ షేర్లు నష్టపోయాయి.

ఇంట్రాడే సాగిందిలా

సెన్సెక్స్ 38,236 పాయింట్ల అత్యధిక స్థాయి, 37,828 పాయింట్ల అత్యల్ప స్థాయిలను నమోదు చేసింది.

నిఫ్టీ 11,305 పాయింట్ల గరిష్ఠ స్థాయి;11,181 పాయింట్ల కనిష్ఠ స్థాయిల మధ్య కదలాడింది.

లాభనష్టాల్లోనివి ఇవే..

టెక్ మహీంద్రా, టైటాన్, నెస్లే ఇండియా, హెచ్​యూఎల్​, హెచ్​డీఎఫ్​సీ బ్యాంక్, ఐటీసీ రాణించాయి.

భారతీ ఎయిర్​టెల్, టాటా స్టీల్, ఇండస్​ఇండ్ బ్యాంక్ ఎం&ఎం, సన్​ఫార్మా, ఐసీఐసీఐ బ్యాంక్ షేర్లు నష్టాలతో ముగిశాయి.

ఆసియా మార్కెట్లు

ఆసియాలో ఇతర ప్రధాన మార్కెట్లు షాంఘై, టోక్యో సూచీలు బుధవారం నష్టాలను నమోదు చేశాయి. హాంకాంగ్ సూచీలు స్వల్పంగా లాభాలను గడించాయి.

రూపాయి, ముడి చమురు

కరెన్సీ మార్కెట్​లో రూపాయి బుధవారం 10 పైసలు పెరిగింది. డాలర్​తో పోలిస్తే మారకం విలువ ప్రస్తుతం 73.76 వద్దకు చేరింది.

ముడి చమురు ధరల సూచీ-బ్రెంట్ 0.49 శాతం తగ్గింది. అంతర్జాతీయ మార్కెట్​లో బ్యారెల్ ముడి చమురు ధర 40.83 డాలర్లుగా ఉంది.

ఇదీ చూడండి:రిలయన్స్​లో మరో సంస్థ భారీ పెట్టుబడి