మారటోరియం సమయంలో రుణాలపై వడ్డీ వసూలు చేయటాన్ని సవాలు చేస్తూ దాఖలైన వ్యాజ్యంపై స్పందించాలని కేంద్ర ప్రభుత్వం, భారతీయ రిజర్వ్ బ్యాంక్(ఆర్బీఐ)కు నోటీసులు జారీ చేసింది సుప్రీం కోర్టు.
జస్టిస్ అశోక్ భూషణ్ నేతృత్వంలోని త్రిసభ్య ధర్మాసనం వీడియో కాన్ఫరెన్స్ ద్వారా ఈ వ్యాజ్యంపై విచారణ చేపట్టింది. వారంలోపు తమ స్పందనలు తెలపాలని కేంద్రం, ఆర్బీఐకి నోటీసులు ఇచ్చింది.
ఈ సందర్భంగా.. ఆర్బీఐ అందించిన ప్రయోజనాలు రుణ గ్రహీతలకు అందుతున్నట్లు కనిపించటం లేదని కేంద్ర తరఫున హాజరైన సొలిసిటర్ జనరల్ తుషార్ మెహతకు తెలిపింది ధర్మాసనం. అనంతరం పలు సూచనలు చేసింది. కౌంటర్ అఫిడవిట్ దాఖలు చేసేందుకు వారం రోజుల సమయం కావాలని ఆర్బీఐ తరఫు న్యాయవాది కోరిన క్రమంలో అనుమతించినట్లు ఆదేశాల్లో పేర్కొంది.
మారటోరియంలో రుణాలపై వడ్డీ కొనసాగించటాన్ని సవాల్ చేస్తూ ఆగ్రాకు చెందిన గజేంద్ర శర్మ పిటిషన్ దాఖలు చేశారు. మార్చి 27న విడుదల చేసిన ఆర్బీఐ ప్రకటనలో మారటోరియం సమయంలో వడ్డీ కొనసాగింపు నిర్ణయాన్ని వెనక్కి తీసుకునేలా చూడాలని కోరారు. వడ్డీ లేకుండా రుణాలు చెల్లించేందుకు ఉపశమనం కల్పించేందుకు కేంద్రం, ఆర్బీఐకి ఆదేశాలు ఇవ్వాలని పిటిషన్లో పేర్కొన్నారు.
మారటోరియం విధించిన క్రమంలో ఈ విధంగా రుణగ్రహీతలకు జరిమానా విధించొద్దని, బ్యాంకులు వడ్డీని వసూలు చేయకుండా చూడాలని కోరారు పిటిషనర్ తరఫు న్యాయవాది.
ఇరు వర్గాల వాదనలు విన్న ధర్మాసనం.. తదుపరి విచారణను వచ్చే వారానికి వాయిదా వేసింది.
కరోనా వైరస్ కారణంగా మార్చి 1నాటికి చెల్లించాల్సిన అన్ని రుణాలపై 3 నెలల మారటోరియం విధిస్తూ మార్చి 27 ఆదేశాలు జారీ చేసింది ఆర్బీఐ. అయితే వడ్డీ కొనసాగుతుందని పేర్కొంది. లాక్డౌన్ పోడిగించిన నేపథ్యంలో మారటోరియం మారోమారు ఆగస్టు 31 వరకు పెంచింది.
