మాల్యా కేసులో కేంద్రానికి సుప్రీం కీలక ఆదేశాలు

ఆర్థిక నేరారోపణలు ఎదుర్కొంటున్న లిక్కర్ కింగ్ విజయ్ మాల్యాపై దాఖలైన కోర్టు దిక్కరణ పిటిషన్​ను​ సుప్రీం కోర్టు సోమవారం విచారించింది. మాల్యాను భారత్​కు రప్పించే ప్రక్రియపై ఆరు వారాల్లోపు నివేదిక సమర్పించాలని కేంద్రాన్ని ఆదేశించింది.

దేశీయ బ్యాంకులకు రుణాలు ఎగ్గొట్టి విదేశాల్లో తలదాచుకుంటున్న వ్యాపారవేత్త విజయ్​ మాల్యాను భారత్​కు అప్పగించే ప్రక్రియ ఎంత వరకు వచ్చిందో చెప్పాలని కేంద్రాన్ని ఆదేశించింది సుప్రీం కోర్టు. ఈ విషయంపై ఆరు వారాల్లోపు నివేదిక సమర్పించాలని ప్రభుత్వం తరఫు న్యాయవాది సొలిసిటర్ జనరల్ తుషార్ మెహతాకు సూచించింది.

మాల్యాపై దాఖలైన కోర్టు ధిక్కరణ పిటిషన్​ను విచారించిన జస్టిస్ యూయూ లలిత్ నేతృత్వంలోని ధర్మాసనం ఈ ఆదేశాలు జారీ చేసింది. మాల్యా అప్పగింతపై లండన్ హై కమిషన్ నుంచి సమాచారం లేదని తుషార్ మెహతా కోర్టుకు తెలిపారు.

ఈ కేసులో తదుపరి విచారణ వచ్చే ఏడాది జనవరి మొదటి వారానికి వాయిదా వేసింది అత్యన్నత న్యాయస్థానం.

బ్రిటన్​లో 'రహస్య' న్యాయపరమైన ప్రక్రియ పూర్తయ్యే వరకు మాల్యాను భారత్​కు అప్పగించే అవకాశం లేదని అక్టోబర్ 5న సుప్రీం కోర్టుకు కేంద్రం నివేదించడం గమనార్హం.

ఇదీ చూడండి:'మాల్యాను రప్పించేందుకు రహస్య ఆపరేషన్​'