ప్రముఖ వీడియో యాప్ టిక్టాక్ను వాడకూడదని తమ ఉద్యోగులకు ఇచ్చిన ఆదేశాలపై వివరణ ఇచ్చింది ఈ- కామర్స్ దిగ్గజం అమెజాన్. యాప్ను డిలీట్ చేయాలని తమ ఉద్యోగులకు పొరపాటున మెయిల్ చేసినట్లు స్పష్టం చేసింది.
"ఈ రోజు ఉదయం మా ఉద్యోగులకు పొరపాటున మెయిల్ వెళ్లింది. టిక్టాక్ యాప్నకు సంబంధించి మా విధానాల్లో ఎలాంటి మార్పులు చేయలేదు."
- జేసీ అండర్సన్, అమెజాన్ అధికార ప్రతినిధి
అయితే ఈ మెయిల్ వెనక ఏం జరిగిందన్న విషయంపై స్పందించేందుకు జేసీ అండర్సన్ నిరాకరించారు.
ఇదీ జరిగింది..
టిక్టాక్ యాప్ వాడొద్దంటూ తమకు ఈమెయిల్ ద్వారా అమెజాన్ ఆదేశాలు ఇచ్చినట్లు సంస్థకు చెందిన కొంతమంది ఉద్యోగులు ట్విటర్‌లో పేర్కొన్నారు. ఈ మెయిల్లో.. అమెజాన్ ఈమెయిల్ వాడే ప్రతి ఒక్కరూ కచ్చితంగా టిక్టాక్ను తొలగించాలని సంస్థ మార్గదర్శకాలు జారీ చేసినట్లు ఉద్యోగులు వివరించారు. టిక్టాక్ ద్వారా భద్రతా సమస్యలు తలెత్తే అవకాశం ఉందని.. యాప్ను తొలగించిన తర్వాతే ఈ- మెయిల్ వినియోగించుకునేందుకు అవకాశం ఉంటుందని అమెజాన్ స్పష్టం చేసినట్లు సమాచారం.
అమెరికా దిగ్గజ రిటైల్‌ కంపెనీల్లో వాల్‌మార్ట్‌ తరువాత 8.4 లక్షల మంది ఉద్యోగులతో అమెజాన్ రెండో అతిపెద్ద కంపెనీగా ఉంది.
టిక్టాక్ స్పందన..
అంతకుముందు అమెజాన్ చర్యపై స్పందించింది టిక్టాక్ యాజమాన్యం. ఈ చర్యకు ఉపక్రమించేముందు వారి అభ్యంతరాలపై తమతో మాట్లాడి ఉండాల్సిందని వ్యాఖ్యానించింది. ఈ విషయంలో అమెజాన్‌తో చర్చలకు సిద్ధంగా ఉన్నామని టిక్టాక్ వెల్లడించింది.
ఇదీ చూడండి:టిక్టాక్ సహా ఆ 59 యాప్లకు కేంద్రం 79 ప్రశ్నలు!