RIL Investment News: రిలయన్స్ తన వ్యాపార సామ్రాజాన్ని మరింత విస్తరిస్తోంది. ఇప్పటికే దేశ, విదేశాల్లో భారీగా పెట్టుబడులు పెట్టిన ఈ సంస్థ.. తాజాగా దేశీయ రోబోటిక్స్ కంపెనీలో 54 శాతం వాటాను సొంతం చేసుకుంది. ఇందుకోసం సుమారు 132 మిలియన్ డాలర్లను (సుమారు రూ.983 కోట్లు) వెచ్చించింది. ఈ విషయాన్న రోబోటిక్స్ సంస్థ అయిన యాడ్వెర్బ్ ప్రతినిధి వెల్లడించారు.
సంస్థ కార్యకలాపాలను మరింత విస్తరించే దిశగా రిలయన్స్ పెట్టుబడులను యాడ్వెర్బ్లోకి ఆహ్వానించినట్లు సంస్థ సహ వ్యవస్థాపకుడు, సీఈఓ సంగీత్ కుమార్ తెలిపారు. దీనితో పాటు ఉత్తర్ప్రదేశ్లోని నోయిడాలో అతిపెద్ద రోబోటిక్ తయారీ కేంద్రాన్ని ఏర్పాటు చేయనున్నట్లు పేర్కొన్నారు. ఈ పెట్టుబడి కారణంగా కంపెనీ కార్యకలాపాల్లో ఎటువంటి మార్పులు ఉండవని స్పష్టం చేశారు. గతంలో మాదిరిగానే కొనసాగుతాయని వివరించారు.
ఇప్పటికే తమ సంస్థ ఏడాదికి సుమారు 10 వేలకుపైగా రోబోలను తయారు చేస్తున్నట్లు సంగీత్ కుమార్ తెలిపారు.
"తాజాగా రిలయన్స్.. యాడ్వెర్బ్లో పెట్టుబడి పెట్టింది. దీంతో సుమారు 54 శాతం వాటాను సొంతం చేసుకొని సంస్థలో అతిపెద్ద వాటాదారుగా నిలిచింది. రిలయన్స్తో ఇప్పటికే మాకు మంచి వ్యాపార సంబంధాలు ఉన్నాయి. జియో మార్ట్ సేవల కోసం ఆటోమేటెడ్ వేర్హౌసెస్ను తయారు చేసాము. ఈ కారణంగానే మా సంస్థలో పెట్టుబడి పెట్టారు. ఆ సంస్థతో ఉన్న వ్యూహాత్మక భాగస్వామ్యం కారణంగా 5జీ సాంకేతికతను ఉపయోగించుకుంటూ, బ్యాటరీ టెక్నాలజీని అందిపుచ్చుకుంటాము. దీని ద్వారా కార్బన్ ఫైబర్తో మరింత అధునాతనమైన రోబోలను తయారు చేయగలం."