రుణాలపై ఈఎంఐ భారం యథాతథం- ఎందుకిలా?

కీలక వడ్డీ రేట్లను వరుసగా 5 సార్లు తగ్గిస్తూ వచ్చిన ఆర్​బీఐ.. ఒక్కసారిగా కోతకు బ్రేకులు వేసింది. కీలక వడ్డీ రేట్లను యథాతథంగా ఉంచుతూ నిర్ణయం తీసుకుంది. ఆర్థిక మందగమనం, ఆహార పదార్థాల ధరల పెరుగుదల, ద్రవ్యోల్బణాన్ని కట్టడి చేసేందుకే ప్రాధాన్యం ఇచ్చింది.

కీలక వడ్డీరేట్లను వరుసగా తగ్గిస్తూ వచ్చిన ఆర్​బీఐ.. అనూహ్యంగా బ్రేకులు వేసింది. ఇవాళ్టి ద్వైమాసిక పరపతి విధాన సమీక్షలో కీలక వడ్డీరేట్లను యథాతథంగా ఉంచుతూ నిర్ణయం తీసుకుంది. ఆర్థిక మందగమనం, ఆహార పదార్థాల ధరల పెరుగుదల, ద్రవ్యోల్బణాన్ని కట్టడి చేసేందుకే ప్రాధాన్యం ఇచ్చింది.

ఆర్​బీఐ ఈ ఏడాది వరుసగా ఐదుసార్లు కీలక వడ్డీ రేట్లు తగ్గించింది. అయితే ఈసారి మాత్రం రెపోరేటును 5.15 శాతం, రివర్స్ రెపోరేటును 4.90 శాతంగా కొనసాగించాలని ఆర్​బీఐ గవర్నర్​ శక్తికాంత దాస్ నేతృత్వంలోని ఆరుగురు సభ్యుల ద్రవ్యవిధాన కమిటీ (ఎంపీసీ) ఏకగ్రీవంగా తీర్మానించింది.

సెప్టెంబర్ త్రైమాసికంలో వృద్ధిరేటు ఆరు సంవత్సరాల కనిష్ఠానికి (4.5 శాతం) పడిపోయింది. ఈ నేపథ్యంలో మందగించిన ఆర్థికవ్యవస్థకు మద్దతుగా కేంద్ర బ్యాంకు ఆరోసారి కీలక వడ్డీరేట్లు తగ్గిస్తుందని బ్యాంకర్లు, ఆర్థికవేత్తలు భావించారు. అయితే ఆర్​బీఐ అనూహ్య నిర్ణయంతో అందరూ కంగుతిన్నారు.

ద్రవ్య విధాన ప్రకటన ముఖ్యాంశాలు:

• రెపోరేటు లేదా స్వల్పకాలిక రుణరేటు (5.15 శాతం) యథాతథం
• ప్రస్తుత ఆర్థిక సంవత్సరానికి జీడీపీ వృద్ధిరేటు అంచనాలు 6.1 శాతం నుంచి 5 శాతానికి తగ్గింపు
• డిమాండ్ తక్కువగా ఉందని వేర్వేరు కీలక సూచీల ద్వారా స్పష్టం
• వృద్ధి పునరుద్ధరణకు ఆర్థిక చేయూతను కొనసాగించాలని నిర్ణయం
• భవిష్యత్​లో కీలక వడ్డీరేట్లు తగ్గించే అవకాశం ఉందని సంకేతాలు
• ఆర్థిక సంవత్సరం ద్వితీయార్థంలో చిల్లర ద్రవ్యోల్బణం 5.1 నుంచి 4.7 శాతానికి చేరుకునే అవకాశముందని అంచనా.
• 2019 మార్చి నాటికి 38.8 బిలియన్​ డాలర్లుగా ఉన్న విదేశీమారక నిల్వలు.. డిసెంబర్​ 3 నాటికి 451.7 బిలియన్​ డాలర్లుగా ఉన్నాయని వెల్లడి

ఆర్​బీఐ తదుపరి ద్రవ్య పరపతి విధాన సమీక్ష 2020 ఫిబ్రవరి 4-6 తేదీల్లో జరగనుంది.

ఇదీ చూడండి:కోతలకు ఆర్బీఐ బ్రేక్​- మార్కెట్లకు షాక్​