'వైద్యశాస్త్రంపై రాం​దేవ్​కు దురుద్దేశమేమీ లేదు'

ఆధునిక వైద్య శాస్త్రంపై యోగా గురువు రాందేవ్​ బాబాకు వ్యతిరేక ఉద్దేశమేమీ లేదని పతంజలి యోగ్‌పీఠ్ ప్రకటించింది. ఈ మేరకు అల్లోపతికి వ్యతిరేక ప్రకటనలు చేస్తూ.. రాందేవ్ ప్రజలను తప్పుదోవ పట్టించారనే భారతీయ వైద్య సంఘం (ఐఎంఏ) ఆరోపణలను ఖండించింది.

''ఆధునిక వైద్య శాస్త్రం, ఔషధాలపై బాబాకు దురుద్దేశమేమీ లేదు. ఆయనకు వ్యతిరేకంగా జరిగే ప్రచారంలో భాగంగానే నకిలీ వీడియోలు ప్రచారం అవుతున్నాయి.''

-పతంజలి యోగ్​పీఠ్​ ట్రస్ట్

కరోనా మహమ్మారి విసిరిన సవాళ్ల మధ్య రాత్రి-పగలు తేడా లేకుండా సేవలందిస్తున్న వైద్యులు, సహాయక సిబ్బంది పట్ల రాందేవ్ కృతజ్ఞత కలిగి ఉన్నారని, అభినందనలు తెలుపుతున్నారని పతంజలి యోగ్​పీఠ్​ ట్రస్ట్ ఓ ప్రకటనలో తెలిపింది.

"అల్లోపతి ఏక్ స్టుపిడ్ ఔర్ దివాని సైన్స్ హై" (అల్లోపతి ఒక స్టుపిడ్ సైన్స్) అని రాందేవ్ బాబా అంటున్నట్లుగా సామాజిక మాధ్యమాల్లో చక్కర్లు కొడుతున్న ఓ వీడియోను ఉటంకించిన ఐఎంఏ.. ఆయనపై కేసు నమోదు చేయాలని డిమాండ్​ చేసింది.

అయితే.. అది రాం​దేవ్​కు వాట్సాప్​లో వచ్చిన ఒక ఫార్వార్డ్ సందేశమని.. దానిని ఓ కార్యక్రమంలో పాల్గొన్న వారికి చదివి వినిపిస్తుండగా తీసిన వీడియో మాత్రమేనని పతంజలి స్పష్టం చేసింది.

ఇవీ చదవండి:'బాబా రాందేవ్‌పై కేసు నమోదు చేయండి'