రైల్వే ఒప్పంద కార్మికులకు 'శ్రామిక్ పోర్టల్' అండ!

కనీస వేతనాల హామీ అమలుకు ఏర్పాటు చేసిన పోర్టల్ సహకారంతో రైల్వే ఒప్పంద కార్మికులకు రూ.3,459 కోట్ల వేతనాలు చెల్లించినట్లు ఆ శాఖ తెలిపింది. ఈ పోర్టల్ ద్వారా కనీస వేతనాలు కార్మికులకు అందుతున్నదీ లేనిదీ తనిఖీ చేయడానికి వీలువుతున్నట్లు వెల్లడించింది.

రైల్వేలో ఒప్పంద కార్మికులకు కనీస వేతనాల హామీ అమలుకు ఏర్పాటు చేసిన పోర్టల్ సహకారంతో రెండేళ్లలో రూ.3,459 కోట్ల వేతనాలు చెల్లించినట్లు రైల్వేశాఖ గురువారం తెలిపింది.

2018 అక్టోబరు 1న 'శ్రామిక్ కల్యాణ్' పేరిట ఈ-అప్లికేషన్‌ను అభివృద్ధి చేసింది రైల్వే. దీని ద్వారా గుత్తేదారులు కనీస వేతన చట్టం నిబంధనలను పాటిస్తూ రోజువారి ప్రాతిపదికన పనిచేస్తున్న కార్మికులకు ఎంత చెల్లిస్తున్నారో ఎప్పటికప్పుడు అప్లోడ్ చేయాల్సి ఉంటుంది. ఒప్పంద కార్మికులకు జరుగుతున్న చెల్లింపులపై నిఘా వేయడానికి ఈ పోర్టల్ దోహదపడుతున్నట్లు రైల్వేశాఖ ఓ ప్రకటనలో పేర్కొంది. 2021 మార్చి 9 నాటికి ఇందులో 15,812 మంది గుత్తే దారులు, 3,81,881 మంది ఒప్పంద కార్మికులు రిజిస్టర్ అయినట్లు తెలిపింది.

రైల్వేశాఖ పరిధిలోని అన్ని ప్రభుత్వరంగ విభాగాలు ఈ-అప్లికేషన్‌ను వినియోగిస్తున్నాయి. ఇందులో గుత్తేదారులంతా ప్రతి కార్మికుడి సమగ్ర వివరాలను పొందుపరచాల్సి ఉంటుంది. దీంతో కనీస వేతనాలు కార్మికులకు అందుతున్నదీ లేనిదీ తనిఖీ చేయడానికి వీలవుతున్నట్లు రైల్వేశాఖ తెలిపింది.

ఇదీ చదవండి:కాంగ్రెస్​కు 170 మంది ఎమ్మెల్యేలు గుడ్​బై