యువతలో ఎక్కువగా ఆదరణ పొందిన గేమ్‌ పబ్‌జీని భారత్ నిషేధించిన నేపథ్యంలో పబ్జీ కార్పొరేషన్ దిద్దుబాటు చర్యలను ప్రారంభించింది. ప్రస్తుతం భారత్‌లో పబ్జీ, పబ్జీ లైట్‌ ఫ్రాంఛైజీగా ఉన్న టెన్‌సెంట్‌ను ఆ బాధ్యతల నుంచి తప్పించింది. ఈ మేరకు ఓ ప్రకటన విడుదల చేసింది. చైనాకు చెందిన 118 యాప్లను భారత్ నిషేధించిన వారం రోజుల వ్యవధిలోనే పబ్జీ ఈ నిర్ణయం తీసుకోవడం గమనార్హం. గత బుధవారం కొన్ని చైనా యాప్లను నిషేధిస్తున్నట్లు కేంద్రం ప్రకటించిన తర్వాత ప్రభుత్వ నిబంధనలకు అనుగుణంగా వ్యవహరిస్తామని టెన్సెంట్ ప్రకటించింది. దీంతోనే పబ్జీ కార్పొరేషన్ ఈ నిర్ణయం తీసుకున్నట్లు తెలుస్తోంది.
'తాజాగా నెలకొన్న పరిస్థితుల్లో పబ్జీకి ఫ్రాంచైజీగా ఉన్న టెన్సెంట్ నుంచి గేమ్‌ పబ్లిషింగ్‌ అధికారాలను వెనక్కి తీసుకుంటున్నాం. భవిష్యత్‌లో ఫ్రాంఛైజీలతో సంబంధం లేకుండా చూస్తాం. పబ్జీ గేమింగ్‌ అనుభవాన్ని నేరుగా భారతీయులకు అందించేందుకు పబ్జీ కార్పోరేషన్‌ ప్రయత్నాలు చేస్తోంది' అని పబ్జీ అధికారిక వెబ్‌సైట్‌లో పేర్కొంది. మరి ఈ విషయంలో కేంద్రం ఎలా స్పందిస్తుందో చూడాలి. చైనాతో సంబంధమున్న టెన్‌సెంట్‌ను పక్కన పెట్టడంతో పబ్జీ మళ్లీ ప్లే స్టోర్‌/యాప్ స్టోర్‌లో ప్రత్యక్షమవుతుందా? లేదా అనేది త్వరలో తెలుస్తుంది.