రోటీపై 5% జీఎస్టీ- పరోటాపై 18%... ఎందుకిలా?

రాత్రి డిన్నర్​లో ఎక్కువ మంది అల్పాహారం తీసుకుంటారు. ఇందులో రోటీ, పరోటా, దోశ వంటి ఆహార పదార్థాలకు ప్రజలు ఎక్కువగా మొగ్గుచూపుతారు. అయితే... రోటీపై 5 శాతం జీఎస్​టీ ఉండగా.. పరోటాను 18 శాతం జీఎస్​టీ శ్లాబులో చేర్చారు. ప్రస్తుతం ఈ వర్గీకరణ నెట్టింట చర్చనీయాంశంగా మారింది.

పరోటా, రోటీ.. రుచి వేరేగా ఉన్నా చూడటానికి ఓకేలా ఉంటాయి. తయారీకి దాదాపుగా అంతే సమయం పట్టొచ్చు. అయితే రెండింటిలో పరోటా తినాలంటే మాత్రం మీ జేబుకు కాస్త ఎక్కువ చిల్లు పడొచ్చు. ఇందుకు కారణం జీఎస్‌టీ. రోటీపై 5 శాతం మాత్రమే వస్తు, సేవల పన్ను వేయగా.. పరోటాపై మాత్రం 18 శాతం విధించారు.

ఇలా వర్గీకరణ...

'పరోటా'ను చాప్టర్​ హెడ్డింగ్ 2106 కింద వర్గీకరించింది అథారిటీ ఆఫ్ అడ్వాన్స్ రూలింగ్ (ఏఏఆర్​) కర్ణాటక. ఈ నిర్ణయం ప్రకారం పరోటా అనేది సాదా చపాతీ లేదా రోటీ కాదు కాబట్టి 18% జీఎస్​టీ దానికి వర్తిస్తుందని నిర్ణయించింది. ఐడీ ఫ్రెష్ ఫుడ్ అనే ఆహార ఉత్పత్తుల సంస్థ వేసిన దరఖాస్తుకు స్పందనగా ఈ విషయాన్ని వెల్లడించింది ఏఏఆర్​.

గోధుమ పరోటా, మలబార్ పరోటా తయారీని 1905వ అధ్యాయం కింద వర్గీకరించాలా? అనే అంశంపై దరఖాస్తుదారు స్పష్టత కోరారు. పరోటాపై జీఎస్‌టీని 5 శాతం ఉంచాలని కోరగా.. ఆ నిర్ణయాన్ని తిరస్కరించింది ఏఏఆర్​.

రోటీ ఆనేది 'రెడీ టూ కుక్​' విభాగం కిందకు వస్తుంది కాబట్టి... దాన్ని1905 అధ్యాయంలో పెట్టినట్లు స్పష్టం చేశారు. వీటికి మాత్రమే 5 శాతం జీఎస్​టీ నిబంధన వర్తిస్తుందన్నారు. పరోటా అనేది.. వేడి చేయాల్సి ఉంటుంది కాబట్టి 2106 శీర్షిక కింద వర్గీకరించామని.. ఫలితంగా దానికి 18 శాతం జీఎస్​టీ ఉంటుందని చెప్పారు.