అపాయింట్​మెంట్​ ఉంటేనే షాపింగ్​ మాల్​కు ఎంట్రీ!

ప్రాణాంతక కరోనా వైరస్​ సృష్టించిన విధ్వంసం అంతా ఇంతా కాదు. మహామహా దేశాలే వైరస్​ను అంతమొందించలేక కొట్టుమిట్టాడుతున్నాయి. అన్ని రంగాలపై కోలుకోలేని దెబ్బ కొట్టిందీ మహమ్మారి. బయటకు రావాలంటేనే ప్రజలు భయపడుతున్నారు. ఈ తరుణంలో షాపింగ్​ మాల్స్​ సంగతేంటి..? ఆధునిక యుగంలో ప్రజలకు ప్రీతిపాత్రమైన షాపింగ్​ మాల్స్​లో ఇంతకుమునుపు వైభవం కనిపిస్తుందా..? ఎలాంటి మార్పులు రాబోతున్నాయి. కరోనా​ భయపెట్టినా.. మున్ముందు షాపింగ్​ మరింత సులభంగా, వేగంగా మారనుందా..?

ఒక మహమ్మారి ప్రపంచాన్ని కమ్మేసింది. భూగోళాన్ని చిగురుటాకులా వణికిస్తోంది. ప్రపంచ జనజీవనాన్ని అస్తవ్యస్తం చేస్తోంది. ఆరోగ్య, ఆర్థిక వ్యవస్థల్ని అతలాకుతలం చేసింది. ప్రపంచ మార్కెట్లను బెంబేలెత్తిస్తోంది. ఒక్కటేమిటి.. అన్నింటినీ సమూలంగా నాశనం చేసింది​. హాయిగా ఉండాల్సిన ప్రజలు.. పెద్దగా రోడ్ల మీదకు రావడమే మానేశారు. అన్నింటికీ కారణం ఒక్కటే.. కరోనా వైరస్​.

కరోనా గుప్పిట్లో లాక్​డౌన్​ నడుమ గడిపిన ప్రపంచదేశాలు.. ఆర్థిక వ్యవస్థలు పతనమవుతున్న నేపథ్యంలో ఇప్పుడిప్పుడే ఆంక్షల్లో సడలింపులు ఇస్తున్నాయి. క్రమక్రమంగా అన్నీ తెరుచుకుంటున్నాయి. ఇక్కడ ముఖ్యంగా చెప్పుకోవాల్సింది షాపింగ్​ మాల్స్​ గురించి. వీటి సంగతేంటి..?

జనాలు గుంపులు గుంపులుగా సంచరించే ప్రదేశాల్లో షాపింగ్​ మాల్స్​ ఒకటి. మరి కరోనా భయాందోళనలతో ఇవి పునర్వైభవం సంతరించుకుంటాయా? ఒకప్పటిలా గంటలు గంటలు మాల్స్​లో గడపలేమా? కరోనా ఏం మార్పులు తెచ్చింది?

మాస్కులు, శానిటైజర్లతో స్వాగతం..

కొవిడ్​ దెబ్బకు... షాపింగ్​ మాల్స్​లో పెను మార్పులు రానున్నాయి. మాస్కులు తప్పనిసరి అయ్యాయి. థర్మల్​ స్క్రీనింగ్​, శానిటైజర్లు స్వాగతం పలకనున్నాయి. ఇంకా అధునాతన సాంకేతికతతో కొత్త కొత్తవి ఎదురైనా ఆశ్చర్యపోనవసరం లేదు. కొవిడ్​ సంక్షోభం మొత్తం షాపింగ్​ అనుభవాల్ని తలకిందులు చేసినా.. ఇది మరింత సులభంగా, వేగంగా, సురక్షితంగా మారొచ్చన్నది నిపుణుల మాట.

ఇప్పటికే అమెరికా సహా పలు దేశాల్లో కొత్త టెక్నాలజీలను పరిచయం చేస్తూ షాపింగ్​ మాళ్లూ, స్టోర్లూ తెరుచుకున్నాయి. ఆ అనుభూతులు ఆశ్చర్యాన్ని కలిగించినా.. వాటికి అలవాటు పడక తప్పదంటున్నారు వినియోగదారులు.

''ప్రతిదీ చాలా భిన్నంగా ఉంది. ఇవన్నీ చూస్తుంటే వైరస్ ఎంతటి ప్రభావం చూపిందో అర్థమవుతోంది.''

- టియారా షో, అమెరికాలోని ఓ షాపర్​

'అమెరికన్​ ఈగల్ అవుట్​ఫిట్టర్స్​' మాల్​లో తన అనుభవాల్ని పంచుకుంది 23 ఏళ్ల టియరా. ఆ వస్త్ర దుకాణంలో మాస్కులు తప్పనిసరి చేశారని చెప్పిన ఆమె.. అల్మారాలు క్రమబద్ధంగా అమర్చారని అంటోంది. ట్రయల్స్​కు అనుమతించట్లేదనీ చెప్పుకొచ్చింది.

'' మాల్​లోకి వెళ్లేముందు ఒక్కసారి వాడిపారేసే మాస్కులు అందించారు. అరికాళ్లను శుభ్రపరిచే బ్లూమ్యాట్(స్టిక్కీ మ్యాట్​)​లనూ అందుబాటులోకి తెచ్చారు. జీన్స్​, షర్ట్స్​ విభాగాలు వేర్వేరు చోట్ల ఉన్నాయి. ట్రయల్స్​ను ప్రోత్సహించట్లేదు. ఫిట్టింగ్​ రూంను మూసేశారు. కావాలసినవన్నీ కొన్నాక.. ప్లెక్సీగ్లాస్ డివైడర్ నుంచే నాకందించారు. ప్రింటర్​ నుంచి బయటకు వచ్చిన రసీదును కూడా స్వయంగా నేనే తీసుకున్నాను.''

- టియరా షో, షాపర్​​

వినియోగదారులు సంతృప్తిపడేలా, మాల్​లో అడుగుపెట్టిన క్షణం నుంచి కొత్త అనుభూతికి లోనయ్యేలా చూసుకుంటున్నారు నిర్వాహకులు. ప్రతిదీ విభిన్నంగా ప్రయత్నించాలని చూస్తున్నారు. కొన్నింటిలో రోబోలను పరిచయం చేస్తూ.. సులభతర షాపింగ్​కు అవకాశం కల్పిస్తున్నారు. ఇవన్నీ వినియోగదారులకు సరికొత్త అనుభవాల్ని మిగులుస్తున్నాయి.

''స్టిక్కీ మ్యాట్​, వెల్​కం టేబుల్ ​(మాస్కులు, శానిటైజర్లు).. ఇవన్నీ చూడగానే పరిస్థితులన్నీ మారాయని వినియోగదారుల మదిలో ఆలోచనలు మెదులుతాయి.''

- ఆండ్రూ మెక్​లీన్​, అమెరికాలోని ఓ కంపెనీ చీఫ్ కమర్షియల్​ అధికారి

అందుకో యాప్​..

ఇంకా మాల్స్​లో జనాన్నీ పరిమిత సంఖ్యలోనే అనుమతించనున్నారు. దీనిని ఆచరణలో పెట్టేందుకు అమెరికాలోని స్టోర్లలో విభిన్న యాప్​లను ప్రవేశపెడుతున్నారు. షాపింగ్​ కోసం లోపలికి వెళ్లేముందు.. మాల్​లో ఎంతమంది ఉన్నారో వీటి ​ద్వారా తెలుసుకోవచ్చు. కరోనా కాలంలో ఇది ఎంతో సురక్షితమని అభిప్రాయపడుతున్నారు.

ఇంకా సెలూన్లు, పార్లర్​లు కూడా కఠిన నిబంధనలు అమలుచేస్తున్నాయి. అమెరికాలోని కాస్మోటిక్స్​ దిగ్గజ సంస్థ సిఫోరా.. వినియోగదారులు తమ ఉత్పత్తుల్ని పరీక్షించేందుకు అనుమతి నిరాకరిస్తోంది.

అమెరికా బాటలోనే పలు దేశాలు ఇదే ప్రయత్నిస్తున్నాయి. షాపింగ్​ను సురక్షితంగా, క్రమబద్ధంగా చేసేలా ముందస్తు జాగ్రత్తలు, నివారణ చర్యలు చేపడుతున్నాయి.

అపాయింట్​మెంట్​లు..

జనసందోహాన్ని దృష్టిలో ఉంచుకొని.. కొన్ని స్టోర్లు 'షాప్​ బై అపాయింట్​మెంట్​' అనే కొత్త విధానాన్ని తెరపైకి తీసుకొచ్చాయి. ముందస్తుగా అపాయింట్​మెంట్​ తీసుకొని.. నిర్దేశించిన సమయానికి షాపింగ్​ చేసుకునేలా వెసులుబాటు కల్పించాలని చూస్తోంది యాపిల్​. ఇవంతటా అందుబాటులోకి వస్తే కరోనా భయాలున్నా... భౌతిక దూరం నిబంధన పాటించినట్టే కనుక షాపింగ్​ను సులభంగానే చేసుకోవచ్చన్న మాటలు వినిపిస్తున్నాయి.

వచ్చామా.. కొన్నామా.. వెళ్లామా..!

కరోనా నేర్పిన పాఠాలతో.. సమూల మార్పులు సంభవించాయి. గతంతో పోలిస్తే ఏ రంగంలోనైనా ఒడుదొడుకులు ఉన్నప్పటికీ పటిష్ఠ చర్యలతో కాలక్రమేణా వాటిని అధిగమించొచ్చని విశ్లేషకులు అంటున్నారు. షాపింగ్​ మాల్స్​లోనూ కరోనా వ్యాప్తికి అవకాశం ఉన్నప్పటికీ.. ముందస్తు జాగ్రత్తలు, అధునాతన సాంకేతికతలతో వైరస్​కు చెక్​ పెట్టొచ్చంటున్నారు.

ఇకపై స్టోర్​లోకి వెళ్లడమే ఆలస్యం.. చూశామా, కొన్నామా, వెనుదిరిగామా అనే వాతావరణమే కనిపించే అవకాశాలున్నాయి. మాల్స్​లో వెచ్చించే సమయాన్ని తగ్గించుకొని, అన్నింటినీ సరిగ్గా వినియోగించుకుంటే షాపింగ్​ను ఇకపై సులభంగా, వేగంగా.. సురక్షిత సానుకూల వాతావరణంలోనే చేసుకోవచ్చని సెలవిస్తున్నారు నిపుణులు.

ఇవీ చూడండి: