సొంత ఇల్లు ఉన్న‌ప్ప‌టికీ, ఇత‌ర కార‌ణాల చేత అద్దె ఇంట్లో నివ‌సిస్తున్నట్ల‌యితే ఆదాయపు పన్ను త‌గ్గించుకునేందుకుగాను హెచ్ఆర్ఏ, గృహ రుణం రెండింటినీ క్లెయిమ్ చేయవచ్చు. జులైలో ప్ర‌వేశ‌పెట్టిన బడ్జెట్లో ప్ర‌భుత్వం మొత్తం గృహ రుణ మినహాయింపు ప‌రిమితిని ఏడాదికి రూ.1.5 ల‌క్ష‌ల నుంచి రూ.3.5 ల‌క్ష‌ల‌కు పెంచింది. రూ.45 ల‌క్ష‌ల లోపు విలువైన గృహాల‌కు ఇది వర్తిస్తుంది. ఈ అదనపు మినహాయింపు మార్చి 31, 2020 వరకు తీసుకున్న కొత్త గృహ రుణాలపై లభించనుంది.
హెచ్ఆర్ఏ, గృహ రుణం రెండింటినీ క్లెయిమ్ చేసే అవకాశం ఉంది. కానీ అన్ని సందర్భాల్లోనూ ఇది సాధ్యం కాక‌పోవ‌చ్చు. ఇది వారు చెప్పే కార‌ణంపై ఆధార‌ప‌డి ఉంటుంది. ఆదాయపు పన్ను అధికారులు మీరు అందించిన వివరాలను పరిశీలిస్తే, మీరు ఇల్లు కలిగి ఉన్న చోట నివసించకపోవడానికి త‌గిన కారణం ఉండాలి.
క్లెయిమ్ చేసుకునేందుకు వీలుండే కొన్ని సందర్భాలు..
సొంతింటిపై రుణం చెల్లిస్తూ ఉద్యోగం, ఇత‌ర కార‌ణాల రీత్యా వేరే నగరంలో ప‌నిచేస్తూ అక్కడ అద్దె చెల్లిస్తుంటే, రెండింటినీ క్లెయిమ్ చేసుకోవ‌చ్చు.
ఒక చిన్న ఇల్లు కలిగి ఉండి కూడా పెద్ద ఇంట్లో వారి సౌక‌ర్యం కోసం అద్దెకు ఉన్నప్పుడు క్లెయిమ్ వర్తిస్తుంది.
ఒక చోట ఇల్లు కొనుగోలు చేసిన‌ప్ప‌టికీ, పిల్ల‌ల స్కూళ్లు, ఇత‌ర కార‌ణాలతో వెంట‌నే కొత్త ఇంటికి మార‌క‌పోవ‌డం వంటి సందర్భాల్లో రెండింటిపై పన్ను మినహాయింపు ల‌భించ‌వచ్చు. అంటే సొంత ఇల్లు ఉన్న‌ప్ప‌టికీ, అద్దె ఇంట్లో నివ‌సించ‌డానికి అర్థ‌వంత‌మైన కారణం ఉంటే క్లెయిమ్ చేసుకోవ‌చ్చు.
ఇంటిపై గృహ రుణం చెల్లిస్తూ, వేరే చోట అద్దె చెల్లిస్తున్నప్పుడు సొంతింటి ద్వారా వ‌చ్చిన అద్దె ఆదాయాన్ని లెక్కచూపాలి. ఈ సందర్భంలో కూడా, మీరు హెచ్ఆర్ఏ మినహాయింపు, గృహ రుణ మినహాయింపు రెండింటినీ క్లెయిమ్ చేయవచ్చు.
ఈ సంవత్సరం నుంచి.. రెండు ఆస్తులను ఒకరి సొంత నివాస ప్రయోజనాల కోసం ఉపయోగిస్తే.. రెండింటిని ఆదాయపు పన్ను సొంత ఆస్తిగా ప‌రిగ‌ణించేందుకు అనుమతించింది. ఇంతకుముందు, ఒక ఆస్తిని మాత్రమే స్వీయ-ఆక్రమిత ఆస్తిగా ప‌రిగ‌ణించేది, మిగిలిన వాటిపై వ‌చ్చే అద్దెపై పన్ను వసూలు చేసేది.
ఇదీ చూడండి:పాక్లో మానవ హక్కుల ఉల్లంఘన తీవ్రం: అమెరికా
