కొత్తగా రుణం తీసుకోవాలంటే రుణ చరిత్ర, క్రెడిట్ స్కోర్లను బ్యాంకులు పరిశీలిస్తాయని తెలిసిన విషయమే. అందుకే, ఈ స్కోరు తగ్గకుండా చూసుకోవాలని నిపుణులు ఎప్పుడూ చెబుతుంటారు. కానీ, ఇటీవల కాలంలో చాలామంది ఆదాయాలు తగ్గడం వల్ల.. ఇప్పటికే తాము తీసుకున్న రుణాలకు సకాలంలో వాయిదాలు చెల్లించలేకపోతున్నారు. క్రెడిట్ కార్డు బిల్లులూ గడువు లోపు తీర్చడం లేదు. దీంతో ఎంతోమంది సిబిల్ క్రెడిట్ స్కోరుపై ప్రతికూల ప్రభావం పడుతోంది. సాధారణంగా 750కి మించి క్రెడిట్‌స్కోరు ఉన్నప్పుడు మంచి స్కోరుగా భావిస్తాయి బ్యాంకులు. అధికంగా స్కోరు ఉన్న వారికి వడ్డీ రాయితీలు, ప్రాసెసింగ్‌ ఫీజుల రద్దు లాంటి వెసులుబాట్లనూ కల్పిస్తున్నాయి.
చెల్లించాల్సిన వాయిదాలు.. క్రెడిట్ కార్డు బిల్లులు ఒక రోజు ఆలస్యం చేసినా.. దానికి సంబంధించిన వివరాలు మూడేళ్లపాటు రిపోర్టులో కనిపిస్తాయి. బ్యాంకులు దీన్ని నిశితంగా పరిశీలించి, కొత్త రుణం ఇవ్వడానికి ఆలోచిస్తాయి. కాబట్టి, వీలైనంత వరకూ ఆలస్యం చేయకుండా రుణాన్ని తీర్చేయడం ముఖ్యం.