సీబీఐసీ కార్యకలాపాలన్నీ ఇక ఆన్​లైన్​లోనే

కేంద్ర పరోక్ష పన్నులు, కస్టమ్స్​ బోర్డు కాగిత రహితంగా మారింది. దేశంలోని అన్ని కార్యాలయాల్లో ఈ-ఆఫీస్ విధానాన్ని ప్రారంభించింది. డాక్యుమెంట్ల స్వీకరణ నుంచి అధికారుల తుది అనుమతి వరకు ప్రక్రియ మొత్తం ఆన్​లైన్​లోనే జరుగుతుందని బోర్డు పేర్కొంది. ఈ విధానం వల్ల పరోక్ష పన్ను వ్యవస్థలో పారదర్శకత, జవాబుదారీతనం పెరుగుతుందని స్పష్టం చేసింది.

కేంద్ర పరోక్ష పన్నులు, కస్టమ్స్​ బోర్డు(సీబీఐసీ) తన కార్యకలాపాలన్నింటినీ కాగిత రహితంగా మార్చేసింది. ఈ మేరకు దేశంలోని అన్ని జీఎస్​టీ, కస్టమ్స్​ కార్యాలయాలను పూర్తిగా ఎలక్ట్రానిక్ ఆఫీసులుగా తీర్చిదిద్దింది.

కరోనా ఆంక్షల నేపథ్యంలో.. వీడియో లింక్ ద్వారా ఈ-ఆఫీస్ విధానాన్ని ప్రారంభించారు సీబీఐసీ ఛైర్మన్ అజిత్ కుమార్. నేషనల్ ఇన్ఫర్మేటిక్స్ సెంటర్ డైరెక్టర్ జనరల్ నీతా వర్మ సహా పలువురు సీబీఐసీ ఉన్నతాధికారులు ఈ కార్యక్రమంలో పాల్గొన్నారు.

దేశవ్యాప్తంగా ఉన్న 500 జీఎస్​టీ, కస్టమ్స్​ కార్యాలయాల్లో దాదాపు 50 వేల మంది అధికారులు ఈ-ఆఫీస్ విధానాన్ని ఉపయోగించనున్నట్లు బోర్డు పేర్కొంది. దీంతో కార్యకలాపాల్లో ఆటోమెటిక్ విధానం అమల్లోకి తెచ్చిన అతిపెద్ద ప్రభుత్వ విభాగంగా సీబీఐసీ అవతరించింది.

"కాంటాక్ట్ లెస్, కాగిత​ రహిత పరోక్ష పన్ను పరిపాలనను అందించడంలో ఈ-ఆఫీస్ మరో ముందడుగు. రోజూవారీ పనిలో ఈ-ఆఫీస్ ఉపయోగించడం ద్వారా పారదర్శకత, జవాబుదారీతనం పెరుగుతుంది. పేపర్ వాడకాన్ని తగ్గించడం వల్ల పర్యావరణానికి మేలు కలుగుతుంది."

-సీబీఐసీ

డిజిటల్ డాక్యుమెంట్లను తయారు చేసిన తర్వాత.. అందులోని ఫైళ్లలో మార్పులు చేయడం గానీ ధ్వంసం చేయడం గానీ కుదరదని సీబీఐసీ వెల్లడించింది. ఫైళ్లు ఎక్కడ చిక్కుకుపోయాయనే విషయాన్ని పసిగట్టే యంత్రాంగం కూడా ఈ-ఆఫీస్​లో ఉందని తెలిపింది. దీని ద్వారా సీనియర్ అధికారులు సమస్యను తెలుసుకొని సత్వరం పరిష్కరించే అవకాశం ఉంటుందని పేర్కొంది.

అంతా ఆన్​లైన్​లోనే

డాక్యుమెంట్లను స్వీకరించడం నుంచి, ఫైళ్లను తయారు చేయడం, డ్రాఫ్ట్ లెటర్​ను రూపొందించడం, అధికారుల అనుమతి తీసుకోవడం వరకు మొత్తం ప్రక్రియ ఆన్​లైన్ ద్వారానే జరుగుతుందని అధికారులు వెల్లడించారు. ఈ చర్య వల్ల పన్ను వ్యవస్థలో పారదర్శకత వస్తుందని పేర్కొన్నారు. డిజిటల్ రూపంలో భద్రపర్చడం వల్ల ఫైళ్లను కోల్పోయే ప్రమాదం లేదని అన్నారు.

"డిజిటల్ విధానం గురించి అధికారులు పూర్తిగా తెలుసుకోవడానికి కొంత సమయం పడుతుంది. ఒక్కసారి ఈ-ఫైల్​ను రూపొందిస్తే.. భౌతిక రూపంలో దస్త్రాలు ఉంచే విధానం ఉండదు."

-అధికారులు

ఫైళ్లను నేరుగా తాకే అవసరం ఉండదు కాబట్టి ఈ-ఆఫీస్ విధానం ప్రవేశపెట్టడం ద్వారా కరోనాను నివారించవచ్చని అధికారులు భావిస్తున్నారు. అయితే భద్రతా కారణాల వల్ల కొన్ని రకాల ఫైళ్లను ఈ-ఫైళ్లుగా మార్చే అవకాశం లేదని అధికారులు వెల్లడించారు.

డీఐఎన్​

పారదర్శకతకు అధిక ప్రాధాన్యం ఇచ్చిన పరోక్ష పన్నుల విభాగం... ప్రతీ డాక్యుమెంట్​కు ప్రత్యేకమైన డీఐఎన్(డాక్యుమెంట్ ఐడెంటిఫికేషన్ నెంబర్​)ను కేటాయించేలా ఇదివరకే ఏర్పాట్లు చేసింది. డిపార్ట్​మెంట్ నుంచి వచ్చిన నోటీసులు నిజమో కాదో అని సరిచూసుకోవడానికి పన్ను చెల్లింపుదారులకు ఈ డీఐఎన్ ఉపయోగపడుతుందని పేర్కొంది.

(రచయిత-కృష్ణానంద్ త్రిపాఠీ)

ఇదీ చదవండి:విమాన సంస్థలకు షాక్.. భారీగా పెరిగిన ఏటీఎఫ్ ధరలు