అపరకుబేరుడు, రిలయన్స్ ఇండస్ట్రీస్ అధినేత ముఖేశ్ అంబానీ మరోసారి భారత్లోనే అత్యంత ధనవంతునిగా నిలిచారు. ఐఐఎఫ్ఎల్ వెల్త్ హురున్ ఇండియా విడుదల చేసిన తాజా జాబితాలో రూ.3,80,700 కోట్ల నికర సంపదతో ఆయన అగ్రస్థానం దక్కించుకున్నారు. ముఖేశ్ ఇలా అగ్రస్థానంలో నిలవడం వరుసగా ఇది ఎనిమిదోసారి.
రూ.1,86,500 కోట్లతో...లండన్కు చెందిన ఎస్పీ హిందుజా అండ్ ఫ్యామిలీ తన రెండో స్థానాన్ని నిలబెట్టుకుంది. రూ.1,17,100 కోట్ల సంపదతో విప్రో వ్యవస్థాపకుడు అజీమ్ ప్రేమ్జీ మూడో స్థానంలో నిలిచారు. ఈ ధనవంతుల జాబితాలో 152 మంది మహిళలు చోటుసంపాదించడం విశేషం.
ఐఐఎఫ్ఎల్ వెల్త్ హురున్ ఇండియా రిచ్ లిస్ట్ ప్రకారం.. వెయ్యి కోట్లకుపైగా సంపద కలిగిన భారతీయుల సంఖ్య 2018లో 831కాగా, 2019లో 953కి పెరిగింది. అయితే యూఎస్ డాలర్ ఆధారంగా చూస్తే బిలియనీర్ల సంఖ్య 141 నుంచి 138కి తగ్గింది.