దేశీయ అవసరాలతో పాటు విదేశాలకు ఎగుమతి చేసేందుకు భారీ అవకాశాలున్న సెల్‌ఫోన్‌ తయారీ రంగాన్ని ప్రోత్సహించేందుకు వచ్చే బడ్జెట్‌లో చర్యలు ప్రకటించాలని ఇండియన్‌ సెల్యులార్‌ అండ్‌ ఎలక్ట్రానిక్స్‌ అసోసియేషన్‌ (ఐసీఈఏ) ప్రభుత్వాన్ని కోరుతోంది. ఎగుమతులకు ప్రోత్సాహకాలు కొనసాగించాలని, కొన్ని విడిభాగాల దిగుమతులపై సుంకాన్ని పెంచాలని, సెల్‌ఫోన్‌ కంటే విడిభాగాలపై అధికంగా ఉన్న వస్తు సేవల పన్ను (జీఎస్‌టీ) తగ్గించాలని విజ్ఞప్తి చేసినట్లు ఐసీఈఏ జాతీయ ఛైర్మన్‌ పంకజ్‌ మొహింద్రో ‘ఈనాడు’తో చెప్పారు. ఆయన తెలిపిన వివరాల ప్రకారం..
బడ్జెట్‌ 2020-21 టెలికాం
ఎగుమతులకు..ఎగుమతుల ప్రోత్సాహానికి అమలు చేస్తున్న ఎంఈఐఎస్‌ (మర్కండైజ్‌ ఎక్స్‌పోర్ట్స్‌ ఫ్రం ఇండియా స్కీమ్‌) స్థానంలో ప్రపంచ వాణిజ్య సంస్థ (డబ్ల్యూటీవో) నిబంధనల మేరకు కొత్త నిబంధనావళి అమల్లోకి తెచ్చేవరకు, సెల్‌ఫోన్‌ ఎగుమతులపై 4 శాతం ప్రోత్సాహకాన్ని కొనసాగించాలి. ఇటీవల తొలగించిన 2 శాతం ప్రోత్సాహకాన్ని, పునరుద్ధరిస్తారనే అంచనాలున్నాయి. తయారీ సంస్థలకు కార్పొరేట్‌ పన్నును 10 శాతానికి పరిమితం చేయాలి. దిగుమతి చేసుకునే వస్తువులపై చెల్లించిన కస్టమ్స్‌ను వాపసు పొందేందుకు ఎగుమతిదార్లకు అమలవుతున్న డ్యూటీడ్రాబ్యాక్‌ కింద పరిమితి ఒక్కో ఫోన్‌కు గరిష్ఠంగా రూ.197 మాత్రమే ఉంది. పెరిగిన ధరల దృష్ట్యా ఈ మొత్తాన్ని రూ.700కు పెంచాలి.
రూ.1,000 కోట్ల నిధి అత్యవసరం: ద్విచక్ర వాహనాలు, జనరిక్‌ ఔషధాల రంగంలో దేశీయ సంస్థలు అంతర్జాతీయంగా ఖ్యాతి గడిస్తున్నాయి. ఈ స్థాయిలో సెల్‌ఫోన్‌ తయారీ సంస్థలూ రూపుదిద్దుకునేలా సహకరించేందుకు రూ.1,000 కోట్ల నిధిని అత్యవసరంగా ఏర్పాటు చేయాలి.