మారుతీ కార్లలో లోపం- 1.34 లక్షల యూనిట్లు రీకాల్!

ఫ్యూయల్ పంప్​లో సమస్యలు తలెత్తొచ్చనే అనుమానంతో.. భారీ సంఖ్యలో రెండు మోడళ్ల​ కార్లను రీకాల్ చేయాలని నిర్ణయించింది మారుతీ సుజుకీ. దేశీయంగా మొత్తం 1.34 లక్షల కార్లలో సమస్యలు సరిదిద్దేందుకు వాటిని వెనక్కి పిలిపించనున్నట్లు ప్రకటించింది.

దేశీయంగా అతిపెద్ద కార్ల తయారీ సంస్థ మారుతీ సుజుకీ 1,34,885 కార్లను రీకాల్ చేయనున్నట్లు ప్రకటించింది. వేగనార్, బాలినో మోడళ్ల ఫ్యూయల్​ పంప్​లలో సమస్యలు తలెత్తొచ్చని గుర్తించి.. వాటిని సరిచేసేందుకు ఈ నిర్ణయం తీసుకుంది.

రీకాల్ జాబితాలోని కార్లు ఇవే..

2018 నవంబర్ 15 నుంచి 2019 అక్టోబర్ 15 మధ్య తయారైన వేగనార్(1లీటర్ ఇంజిన్​​) కార్లు, 2019 జనవరి 8 నుంచి 2019 నవంబర్ 4 మధ్య తయారైన బాలినో(పెట్రోల్ వేరియంట్లు) మోడళ్లు ఇందులో ఉన్నట్లు వెల్లడించింది మారుతీ.

56,663 వేగనార్ కార్లు, 78,222 బాలినో యూనిట్లు రీకాల్ జాబితాలో ఉన్నాయి.

రీకాల్ విషయంపై డీలర్లే నేరుగా వినియోగదారులను సంప్రదించనున్నట్లు మారుతీ వెల్లడించింది.

ఇదీ చూడండి:హువావేపై బ్రిటన్ నిషేధం.. అమెరికా హర్షం