దేశీయ అతిపెద్ద కార్ల తయారీ సంస్థ మారుతీ సుజుకీ.. కార్ల ధరలను (Maruti Suzuki Price Hike) మరోసారి పెంచింది. ఆగస్టు 30నే ఈ విషయాన్ని ప్రకటించిన మారుతీ.. తాజాగా పెంచిన ధరలు సోమవారం (సెప్టెంబర్ 6,2021) అమల్లోకి వచ్చినట్లు వెల్లడించింది.
తయారీ, నిర్వహణ, ముడిసరకుల వంటి ఇన్‌పుట్ వ్యయాలు పెరగటం కార‌ణంగా.. వినియోగదారులపై ధరల పెంపు రూపంలో భారాన్ని మోపక తప్పడం లేదని మారుతీ సుజుకీ వివరించింది.
ఎంత పెరిగిందంటే...
సెలెరియో మినహా మిగతా అన్ని మోడళ్లపై సగటున 1.9 శాతం వరకు ధరలు (దిల్లీ ఎక్స్ షోరూం) పెరిగినట్లు (Maruti Suzuki new price) కంపెనీ ప్రకటించింది.
ఈ ఏడాది ఇప్పటికే పలు మార్లు ధరలు పెంచింది మారుతీ సుజుకీ. జులైలో హ్యాచ్ బ్యాక్ సెగ్మెంట్లోని స్విఫ్ట్ సహా.. అన్ని సీఎన్జీ మోడళ్ల ధరలను (దిల్లీ ఎక్స్ షోరూం) రూ.15,000 వరకు పెంచింది. ఏప్రిల్ 16న మోడళ్ల వారీగా.. సగటు ధర 1.6 శాతం ధర పెరిగింది. జనవరి 18న ఎంపిక చేసిన మోడళ్లపై రూ.34 వేల వరకు ధర పెంచింది కంపెనీ.
మారుతీ సుజుకీ ప్రస్తుతం ఎంట్రీ లెవెల్ హ్యాచ్బ్యాక్ సెగ్మెంట్లో ఆల్టో నుంచి ఎస్-క్రాస్ మోడళ్లను.. రూ.2.99 లక్షల నుంచి రూ.12.39 లక్షల (దిల్లీ ఎక్స్షోరూం) ధరల స్థాయిలో విక్రయిస్తోంది.
