అంతర్జాతీయ అంశాలే ఈ వారం స్టాక్ మార్కెట్లను ప్రభావితం చేసే అవకాశాలున్నాయి. దేశీయ పరిణామాలేవీ ఈ వారం లేకపోవడమే ఇందుకు ప్రధాన కారణం.
కార్పొరేట్ల త్రైమాసిక ఫలితాల ప్రకటన దాదాపు ముగింపు దశకు చేరుకుంది. ఇప్పటికే ప్రధాన కంపెనీలు ఫలితాలు ప్రకటించిన కారణంగా మార్కెట్లపై వీటి ప్రభావం అంతగా ఉండకపోవచ్చని నిపుణులు అంటున్నారు.
"ఈ వారం ప్రధానంగా అమెరికా-చైనా వాణిజ్య ఒప్పందం అంశం మార్కెట్లపై ప్రభావం చూపొచ్చు. పెద్దగా అనుకూల పరిణామాలు లేని కారణంగా.. రేంజ్ బౌండ్లో సూచీలు కొనసాగే అవకాశముంది."
-జిమీత్ మోదీ, సామ్కో సెక్యూరిటీస్ సీఈఓ
అమెరికా వడ్డీ రేట్ల నిర్ణయం సహా ఇతర కీలక డేటా.. మార్కెట్లను ప్రభావితం చేసే అవకాశముందని ఎపిక్ రీసెర్చ్ సీఈఓ ముస్తాఫా నదీమ్ అన్నారు. ముఖ్యంగా.. వాణిజ్య యుద్ధం ముగింపు లేదా తాత్కాలిక ఒప్పందానికి అమెరికా-చైనాలు సంకేతాలు ఇస్తే.. మార్కెట్లు సానుకూలంగా స్పందించే అవకాశం ఉందని పేర్కొన్నారు.
అక్టోబర్లో రిటైల్ ద్రవ్యోల్బణం పెరిగిన కారణంగా.. డిసెంబర్లో జరగనున్న ద్రవ్యపరపతి విధాన సమీక్షలో.. ఆర్బీఐ రెపో రేటు తగ్గించే అవకాశం ఉంది. ఈ అంశంపై మదుపరులు దృష్టి సారించొచ్చని స్టాక్ బ్రోకర్లు అంటున్నారు.
అంతర్జాతీయంగా ముడి చమురు ధరలు, డాలర్తో రూపాయి మారకం విలువ వంటివీ మార్కెట్లను ప్రభావితం చేసే అంశాలుగా ఉండనున్నాయి.
ఇదీ చూడండి: ఫాస్టాగ్తో టోల్ వసూలు కోసం ప్రత్యేక అధికారులు
