వెంటిలేటర్ల తయారీలో మహీంద్రా తొలి అడుగు

కరోనా వైరస్‌ దేశంలో వేగంగా వ్యాపిస్తున్న నేపథ్యంలో ప్రముఖ వాహన తయారీ సంస్థ మహీంద్రా&మహీంద్రా వెంటిలేటర్ల తయతారీకి సిద్ధమైంది. ఈ మేరకు వెంటిలేటర్‌ నమూనాను రూపొందించమని ఆదేశించినట్లు ఆ సంస్థ అధికారులు తెలిపారు. దీనికి సంబంధించి ఓ వీడియోను ట్విట్టర్లో షేర్‌ చేశారు మహీంద్రా గ్రూప్ అధినేత ఆనంద్‌ మహీంద్రా.

కరోనా పోరులో తనవంతు సహకారం అందిస్తామని ప్రకటించిన మహీంద్రా గ్రూప్‌.. అందులో భాగంగా తొలి అడుగు వేసింది. రూ.7,500కే అధునాతన వెంటిలేటర్‌ అందించేందుకు సన్నద్ధమవుతున్నామని తెలిపింది. అంబు బ్యాగ్‌గా పిలిచే ఆటోమేటెడ్‌ వెర్షన్‌ వాల్వ్‌ మాస్క్‌ వెంటిలేటర్‌ నమూనాను రూపొందించామని, మూడు రోజుల్లో అనుమతులు లభించే అవకాశం ఉందని ఆశిస్తున్నట్లు పేర్కొంది.

"కొవిడ్‌పై పోరులో భాగంగా దేశీయ ఐసీయూ వెంటిలేటర్ల తయారీ సంస్థతో కలిసి పనిచేస్తున్నాం. అధునాతన మెషిన్ల ఖరీదు సుమారు రూ.5 నుంచి 10 లక్షల వరకు ఉంటుంది. మా బృందం రూపొందించిన ఈ వెంటిలేటర్‌ సుమారు రూ.7,500 మాత్రమే అవుతుందని అంచనా వేస్తున్నాం" అని మహీంద్రా గ్రూప్‌ ఛైర్మన్‌ ఆనంద్‌ మహీంద్రా ట్వీట్‌ చేశారు. దీన్ని రూపొందించిన బృంద సభ్యులకు ధన్యవాదాలు చెబుతూ ఓ వీడియోను పోస్ట్‌ చేశారు.

సమష్టిగా పని చేస్తాం..

వెంటిలేటర్ల కొరతను అధిగమిచేందుకు తయారీ సంస్థతో పాటు రెండు అతిపెద్ద ప్రభుత్వ రంగ సంస్థలతో కలిసి పనిచేస్తున్నట్లు మహీంద్రా అండ్‌ మహీంద్రా మేనేజింగ్‌ డైరెక్టర్‌ పవన్‌ గొయెంకా ట్వీట్‌ చేశారు. మరోవైపు తమ బృందం అంబు బ్యాగ్‌ రూపకల్పనలో పనిచేస్తోందని తెలిపారు. మూడు రోజుల్లో అనుమతులు వస్తాయని భావిస్తున్నామని, ఒకసారి వచ్చాక తయారీకి వీలు కలుగుతుందని వివరించారు. కొవిడ్‌పై పోరాడేందుకు వెంటిలేటర్లను తయారుచేస్తామని ఆదివారం ఆనంద్‌ మహీంద్రా ప్రకటించిన విషయం తెలిసిందే.

ఇదీ చూడండి:'ఉద్యోగులకు ఊరట... ఈపీఎఫ్‌ భారం కేంద్రానిదే'