అమెజాన్ బాస్ సంపద ఒక్క రోజులో రూ.97 వేల కోట్లు ప్లస్

ఈ-కామర్స్ సంస్థ అమెజాన్ అధినేత జెఫ్​ బెజోస్ కేవలం ఒక్క రోజులో రికార్డు స్థాయిలో రూ.97 వేల కోట్లు గడించారు. అమెరికా మార్కెట్లలో సంస్థ షేర్లు సోమవారం భారీగా పుంజుకోవడం ఇందుకు కారణం. దీనితో బెజోస్ మొత్తం సంపద రూ.14 లక్షల కోట్లు దాటింది.

ప్రపంచ అపరకుబేరుడు, ఈ-కామర్స్ దిగ్గజం అమెజాన్ అధినేత జెఫ్​ బెజోస్ మరో కొత్త రికార్డు నెలకొల్పారు. ఒక్క రోజులోనే (సోమవారం) బెజోస్ సంపద 13 బిలియన్​ డాలర్లు (రూ.97 వేల కోట్ల పైమాటే) పెరిగింది.

అమెరికా స్టాక్ మార్కెట్లలో అమెజాన్ షేర్లు జులై 20న దాదాపు 8 శాతం పెరిగి 3,196.84 డాలర్ల (జీవనకాల గరిష్ఠం) వద్దకు చేరింది. దీనితో బెజోస్ సంపద ఈ స్థాయిలో వృద్ధి చెందింది.

సంక్షోభంలోనూ వృద్ధే..

బ్లూమ్​బర్గ్ బిలియనీర్స్ ఇండెక్స్ ప్రకారం బెజోస్ సంపద ఈ ఏడాది ఇప్పటి వరకు 74 బిలియన్ డాలర్లు పెరిగి.. 189.3 బిలయన్ డాలర్లకు (రూ.14 లక్షల కోట్లకుపైమాటే) చేరింది. ఇప్పటికే బెజోస్ ప్రపంచ ధనవంతుల్లో అగ్రస్థానంలో ఉన్నారు.

2012 నుంచి బ్లూమ్​బర్గ్ ఇండెక్స్ ప్రపంచ కుబేరుల సంపద వివరాలు వెల్లడిస్తోంది. అప్పటి నుంచి ఒక్క రోజులో వ్యక్తిగత సంపద ఈ స్థాయిలో పెరగటం ఇదే ప్రథమం.

కరోనా వల్ల అమెరికా సహా ప్రపంచ దేశాలన్నీ తీవ్ర ఆర్థిక సంక్షోభంలో కూరుకుంటే.. అమెజాన్ మాత్రం ఈ ఏడాది భారీగా పుంజుకోవడం గమనార్హం.

ఇదే సమయంలో బెజోస్​ మాజీ భార్య మెకాంజీ సంపద కూడా ఒక్క రోజులో (సోమవారం) 4.6 బిలియన్ డాలర్లు పెరిగింది. ప్రపంచవ్యాప్తంగా అత్యంత ధనవంతుల జాబితాలో ఈమె 13వ స్థానంలో ఉన్నారు.

ఇదీ చూడండి:సొంత 5జీ టెక్నాలజీతో 'క్లీన్​ టెల్కో'గా రిలయన్స్ జియో!