రిలయన్స్ ఇండస్ట్రీస్‌, ఆ సంస్థ అనుబంధ కంపెనీలు కలిసి సంస్థకు చెందిన తూర్పు ఆఫ్‌షోర్‌ కేజీ-డి6 బ్లాక్‌లోని కొత్త గ్యాస్‌లో నాలుగింట మూడో వంతును (75%) కొనుగోలు చేసినట్లు తెలుస్తోంది. దిగుమతి రేటుతో పోలిస్తే ప్రభుత్వం నిర్ణయించిన ప్రస్తుత ధర సగం కంటే తక్కువగా ఉండడమే ఇందుకు కారణం. గత వారం రిలయన్స్ తన భాగస్వామి బీపీ పీఎల్‌సీతో కలిసి రోజుకు 5.5 మిలియన్‌ ప్రామాణిక ఘనపు మీటర్ల గ్యాస్‌ను వేలానికి ఉంచింది. అందులో 3.2 ఎమ్‌ఎమ్‌ఎస్‌సీఎమ్‌డీ గ్యాస్‌ను రిలయన్స్ ఓ2సీ వ్యాపారం కొనుగోలు చేసినట్లు సంబంధిత వర్గాలు వెల్లడించాయి.
రిలయన్స్, బీపీల సంయుక్త సంస్థ ఇండియా గ్యాస్‌ సొల్యూషన్స్‌ 1 ఎమ్‌ఎమ్‌ఎస్‌సీఎమ్‌డీని సొంతం చేసుకుందని పేర్కొన్నాయి. మిగతా గ్యాస్‌ను అదానీ గ్యాస్‌, ఐఆర్‌ఎమ్‌ ఎనర్జీ, గెయిల్‌, టొరెంట్‌ గ్యాస్‌లు సొంతం చేసుకున్నాయని తెలుస్తోంది. ఇ-వేలంలో ధర జేకేఎమ్‌ ఎల్‌ఎన్‌జీ ధరతో పోలిస్తే 0.06 డాలర్లు తక్కువగా ఉందని.. ప్రస్తుత ధర వద్ద అది ఒక్కో ఎమ్‌ఎమ్‌బీటీయూకు 8-9 డాలర్లకు సమానమని.. అయితే ఇందులో సగం కంటే తక్కువ రేటుకే కొనుగోలుదార్లు సొంతం చేసుకున్నారని ఆ వర్గాలు తెలిపాయి.