11 నెలల గరిష్ఠానికి ఇంధన డిమాండ్

వరుసగా నాలుగో నెలలోనూ దేశీయ ఇంధన గిరాకీ మెరుగుపడింది. డిసెంబర్​లో పెట్రో ఉత్పత్తుల వినియోగం 18.59 మిలియన్ టన్నులకు చేరి 11 నెలల గరిష్ఠాన్ని నమోదు చేసింది. కొవిడ్ పూర్వస్థితితో పోలిస్తే ఇది 2 శాతం తక్కువ అని పెట్రోలియం ప్లానింగ్, అనాలసిస్ సెల్ వివరించింది.

కరోనా కారణంగా డిమాండ్ లేమితో సతమతమైన భారత ఇంధన మార్కెట్లు క్రమంగా కోలుకుంటున్నాయి. వరుసగా నాలుగో నెలలోనూ ఇంధన గిరాకీ పెరిగింది. ఆర్థిక కార్యకలాపాలు సాధారణ స్థితికి చేరుకుంటున్న వేళ.. 2020 డిసెంబర్​లో పెట్రోలియం ఉత్పత్తుల డిమాండ్ 18.59 మిలియన్ టన్నులుగా నమోదైంది. కొవిడ్ పూర్వ స్థితితో పోలిస్తే ఇది 2 శాతం తక్కువ. అయితే, గత పదకొండు నెలల్లో అత్యధిక డిమాండ్ డిసెంబర్​లోనే నమోదు కావడం విశేషం.

ఫిబ్రవరి 2020 తర్వాత పెట్రోలియం ఉత్పత్తుల వినియోగం డిసెంబర్​లోనే అత్యధికంగా ఉందని కేంద్ర ఇంధన వనరుల మంత్రిత్వ శాఖ ఆధ్వర్యంలోని పెట్రోలియం ప్లానింగ్, అనాలసిస్ సెల్ వెల్లడించింది.

• కర్మాగారాల్లో ఉపయోగించే నాఫ్తా డిమాండ్ డిసెంబర్​లో 2.67 శాతం పడిపోయి 1.23 మిలియన్ టన్నులకు చేరింది.
• రహదారి నిర్మాణాల్లో వాడే బిట్యుమెన్ వినియోగం 20 శాతం అధికమై.. 7.61 లక్షల టన్నులకు పెరిగింది.
• ఎల్​పీజీ డిమాండ్ 7.4 శాతం పెరిగి 2.53 మిలియన్ టన్నులకు చేరుకుంది.
• ఏవియన్ టర్బైన్ ఫ్యూయల్(ఏటీఎఫ్) అమ్మకాలు 41 శాతం పడిపోయి.. 4.28 లక్షల టన్నులకు పరిమితమయ్యాయి. అయితే నవంబర్​తో పోలిస్తే డిసెంబర్​లో ఏటీఎఫ్ డిమాండ్ 13.5 శాతం పెరగడం గమనార్హం.

పెట్రోల్, డీజిల్ డిమాండ్ సెప్టెంబర్, అక్టోబర్ నెలల్లోనే కొవిడ్ పూర్వ స్థితికి చేరాయి. అయితే, నవంబర్, డిసెంబర్​లో ఈ డిమాండ్ మళ్లీ తగ్గింది. క్రితం సంవత్సరం లెక్కలతో పోలిస్తే.. అక్టోబర్​లో 7.4 శాతం పెరిగిన డిమాండ్.. నవంబర్​లో 6.9 శాతం, డిసెంబర్​లో 2.7 శాతం తగ్గింది.

దేశవ్యాప్తంగా లాక్​డౌన్ విధించడం వల్ల ఏప్రిల్​లో ఇంధన డిమాండ్ 49 శాతం పడిపోయింది. పరిశ్రమలు మూతపడటం, వాహనాలు ఇళ్లకే పరిమితం కావడం వల్ల వినియోగంపై ప్రభావం చూపింది.

ఇదీ చదవండి:రికార్డు స్థాయికి మ్యూచువల్​ ఫండ్ల విక్రయాలు