Mango Export To USA: భారత్ నుంచి అమెరికాకు మామిడి ఎగుమతులపై సుమారు రెండేళ్లుగా ఉన్న అడ్డంకులు తొలగిపోయాయి. కొత్త సీజన్‌లో అమెరికాకు మామిడిని ఎగుమతి చేసేందుకు ఆ దేశ వ్యవసాయ విభాగం నుంచి భారత్ అనుమతి పొందింది.
భారత్‌లో మామిడిని మాగబెట్టే ప్రక్రియను పరిశీలించేందుకు అమెరికా వ్యవసాయ విభాగం ఇన్‌స్పెక్టర్‌లు వస్తుంటారు. అయితే కరోనా కారణంగా అంతర్జాతీయ ప్రయాణాలపై ఆంక్షల నేపథ్యంలో 2020 నుంచి వీరు రావడం కుదరలేదు. ఈ నేపథ్యంలో 2020లో భారత్ నుంచి మామిడి దిగుమతిని అమెరికా నిలిపివేసింది.
అయితే 2021 నవంబర్‌ 23న రెండు దేశాలు పరస్పర ప్రయోజనం పొందేలా భారత వ్యవసాయ శాఖ, రైతు సంక్షేమ సంఘం, అమెరికా వ్యవసాయ విభాగం మధ్య ఒప్పందం కుదిరింది. దీని ప్రకారం మామిడిని మాగబెట్టేందుకు రెండు దేశాలు సంయుక్త ప్రోటోకాల్‌ను పాటిస్తాయి. భారత్ మామిడి, దానిమ్మను అమెరికాకు ఎగుమతి చేసి చెర్రీ, అల్ఫాల్ఫాను దిగుమతి చేసుకుంటుంది. 2019-20 సీజన్‌లో భారత్ అమెరికాకు ఒక వెయ్యి 95 మెట్రిక్‌ టన్నుల మామిడిని ఎగుమతి చేసింది.
అమెరికా తీసుకున్న ఈ నిర్ణయంతో మహారాష్ట్ర, ఉత్తరప్రదేశ్, ఆంధ్రప్రదేశ్, తెలంగాణలో మామిడి పంటను సాగు చేసే రైతులు లబ్ధిపొందనున్నట్లు అధికారులు తెలిపారు.
అమెరికా నుంచి భారత్కు పంది మాంసం..
అమెరికా నుంచి భారత్ ఇకపై పంది మాంసం, దాని సంబంధిత ఉత్పత్తులను దిగుమతి చేసుకోనుంది. ఈ మేరకు ఇరుదేశాల మధ్య ఒప్పందం కుదిరినట్లు అమెరికా వాణిజ్య ప్రతినిధి కేథరీన్ తాయ్, వ్యవసాయ కార్యదర్శి టామ్ విల్సాక్ ఓ ప్రకటన ద్వారా తెలిపారు. ఈ నిర్ణయంతో అమెరికా వ్యవసాయ వాణిజ్యానికి దీర్ఘకాలికంగా ఉన్న అడ్డంకులు తొలిగినట్లు అయ్యిందని కేథరీన్ తాయ్ అన్నారు.