రిటైర్మెంట్​ జీవితం సాఫీగా సాగాలంటే ఎలా?

పదవీ విరమణ తర్వాత చింతలేని జీవితం గడపాలని ప్రతి ఒక్కరూ కోరుకుంటారు. అందుకు ఖర్చులకు సరిపడా సేవింగ్స్ మన దగ్గర ఉండటం ముఖ్యం. లేదంటే ఇబ్బందులు తప్పవు. అందుకే.. ఉద్యోగం ప్రారంభించినప్పటి నుంచే భవిష్యత్తు అవసరాలకు అనుగుణంగా ఆర్థిక లక్ష్యాలను నిర్దేశించుకోవాలి. ఈ విషయంలో పర్సనల్‌ ఫైనాన్స్‌ నిపుణుల సూచనలు మీకోసం...

పదవీ విరమణ తర్వాత జీవితం సాఫీగా సాగాలని అందరూ కోరుకుంటారు. అయితే, చాలా మంది ఆ దిశగా విజయం సాధించలేరు. కారణం.. రిటైర్మెంట్​కు ముందు సేవింగ్స్​ గురించి ఆలోచించకపోవడమే. కొంత మందికి దాని గురించి ఆలోచన ఉన్నప్పటికీ.. పరిస్థితులు సహకరించవు. పిల్లల చదువు, గృహ రుణాలతో పాటు ఇతర లోన్లు కట్టిన తర్వాతే రిటైర్మెంట్‌ ప్లాన్ల వద్దకు వస్తారు.

రిటైర్మెంట్‌ కార్పస్​ను తయారు చేసుకోవాలంటే మొదటి నుంచి సరైన ఆర్థిక ప్రణాళిక ఉండాలని వ్యక్తిగత ఆర్థిక నిపుణులు చెబుతున్నారు. ఇలా ప్రణాళిక లేని వారితో పాటు తక్కువ రిటైర్మెంట్‌ కార్పస్‌ ఉన్న వారు కొన్ని చర్యలు తీసుకోవటం ముఖ్యమని సూచిస్తున్నారు. త్వరగా రిటైర్మెంట్‌ కావాలనుకుంటున్న వారికి కూడా ఈ అంశాలు పనికొస్తాయని అంటున్నారు. అవేంటో చూద్దాం..

ఆదాయాన్ని పెంచుకోవటం..

కొత్త ఉద్యోగంలో చేరి ఆదాయాన్ని పెంచుకోవటం ఒక మార్గమైతే.. ఉన్న కంపెనీలోనే జీతాల పెంపుతో ఎక్కువ పొదుపు చేసుకోవచ్చు. లక్ష్యాలకు అనుగుణంగా పెట్టుబడులు పెట్టడం ద్వారా రిటైర్మెంట్‌కు కావాల్సిన మొత్తం త్వరగా చేకూరుతుంది. అప్పుడు త్వరగా రిటైర్‌ కావొచ్చు. రిటైర్మెంట్‌ తీసుకున్నట్లయితే.. తక్కువ వేతనాన్ని ఇచ్చే పార్ట్‌ టైం ఉద్యోగం అయినా ఖర్చులకు ఉపయోగపడుతుంది. తద్వారా పోర్ట్‌ఫోలియో నుంచి పెట్టుబడి ఉపసంహరణ తగ్గి.. పెట్టుబడులు మరింత ఎక్కువ కాలం కొనసాగుతాయి.

రిటైర్మెంట్‌ సమయం సమీపిస్తుంటే.. అందుకు కావాల్సిన మొత్తాన్ని సరిపడా సమకూర్చుకోని వారు ఆదాయాన్ని పెంచుకోవటం కానీ లేదా పొదుపును పెంచుకోవటం కానీ చేయాలి. పిల్లల చదువులు, గృహ రుణం కూడా పూర్తైన సందర్భంలో ఇంకా ఉద్యోగం చేస్తున్నట్లయితే.. వారికి సాధారణంగా పొదుపు చేసే శక్తి ఎక్కువగా ఉంటుంది. ఈ సమయంలోనే అత్యధిక వేతనం పొందే అవకాశాలు ఉంటాయి. ఇలాంటి వారు రిటైర్మెంట్‌ గురించి ఎక్కువగా ఆలోచించాలని... రిటైర్మెంట్‌ తర్వాత కూడా సాధారణ జీవితం గడిపేందుకు పోర్ట్‌ఫోలియోను తయారు చేసుకుంటూ ఉండాలని వ్యక్తిగత ఆర్థిక నిపుణులు సూచిస్తున్నారు.

ఖర్చులు తగ్గించుకోవటం..

ఆదాయాన్ని పెంచుకోవటం వీలు కాకపోయినట్లైతే.. నెలవారీ ఖర్చులను తగ్గించుకోవచ్చు. దీనివల్ల పొదుపు చేసే మొత్తాన్ని పెంచుకొని రిటైర్మెంట్‌ లక్ష్యాలను చేరుకునేందుకు ప్రయత్నించవచ్చు. పెట్టుబడి మొత్తం, కాలం, రాబడి లాంటి విషయాలను తెలుసుకోవాలి. రిటైర్మెంట్‌ అనంతరం నెలవారీ కనీస ఖర్చులపై ఆందోళన చెందడం కంటే ప్రస్తుతం ఖర్చును తగ్గించుకోవటమే ఉత్తమమని నిపుణులు చెబుతున్నారు.

పనికాలం..

పెట్టుబడులు ఆలస్యంగా ప్రారంభించిన వారికి పదవీ కాలపరిమితిని పెంచుకోవటం మంచి ఎంపిక. దీనివల్ల పెట్టుబడులు పెరిగి ఎక్కువ కాలం కాంపౌండింగ్‌ అవుతాయి. 80 ఏళ్ల జీవన కాల అంచనాతో 60 ఏళ్లకు రిటైర్మెంట్‌ అయినట్లైతే.. రెండు దశాబ్దాల ఖర్చులకు సరిపడా మొత్తం మీ వద్ద ఉండాలి. అయితే పనిచేసే సంవత్సరాల పెంపు నిర్ణయం పనిచేసే సంస్థపై ఆధారపడి ఉంటుంది.

పెట్టుబడులతో...

భద్రత, వృద్ధి అనేవి పెట్టుబడుల్లో చాలా ముఖ్యం. ఈ అంశాలతోనే సమర్థంగా మన లక్ష్యాలను చేరుకోవచ్చు. కొందరి విషయంలో రుణాలు, ఈక్విటీ నిష్పత్తి 20:80 ఉండవచ్చు. మరికొందరికి ఇది 80:20గా ఉండవచ్చు. సరిపడా రిటైర్మెంట్‌ ఫండ్‌ కోసం వేరే అవకాశాలు లేనట్లయితే.. పెట్టుబడులను సమీక్షించుకొని, వాటిని మరింత దూకుడుగా తయారు చేసుకోవచ్చని వ్యక్తిగత ఆర్థిక సలహాదారులు చెబుతున్నారు.

అయితే స్వల్ప కాలంలో ఈక్విటీకి సంబంధించి ఒడుదొడుకులు ఎక్కువగా ఉంటాయన్నది దృష్టిలో పెట్టుకోవాలి. దీర్ఘకాల పెట్టుబడులు మంచి ఫలితాలను ఇస్తాయి. స్వల్ప కాలంలో మీ ఖర్చులకు సరిపడా మొత్తాన్ని సమకూర్చుకోవాలి. దీనివల్ల మీ ఖర్చుల కోసం ఈక్విటీ పెట్టుబడులను ఉపసంహరించుకోకుండా ఉండొచ్చు.

ఇదీ చూడండి:ఇంటి నుంచే సులభంగా బీమా తీసుకోండిలా..