బీఎస్‌-6 అమ్మకాల్లో హోండా మైలురాయి

ఏప్రిల్​ 1నుంచి మార్కెట్లో బీఎస్​-6 వాహనాల విక్రయాలు మాత్రమే అనుమతించనుంది కేంద్రం. ఈ నిర్ణయంపై ఇప్పటికే పలు సంస్థలు బీఎస్​-6 వాహనాలను మార్కెట్లోకి విడుదల చేయటమే కాదు.. విక్రయాలూ ప్రారంభించాయి. ప్రముఖ ద్విచక్రవాహనతయారీ సంస్థ హోండా మోటర్స్​ విక్రయాల్లో దూసుకెళ్తోంది. ఇప్పటికే 5.5 లక్షల యూనిట్లు అమ్ముడైనట్లు ప్రకటించింది.

ప్రముఖ ద్విచక్రవాహన తయారీ సంస్థ హోండా మోటర్స్‌ సరికొత్త మైలురాయిని అధిగమించింది. బీఎస్‌-6 ఉద్గార ప్రమాణాలతో రూపొందించిన ద్విచక్రవాహనాలు ఇప్పటివరకు మొత్తం 5.5లక్షల యూనిట్లు అమ్ముడైనట్లు వెల్లడించింది. ఈ మేరకు హోండా మోటర్స్‌ సీనియర్‌ వైస్‌ ప్రెసిడెంట్‌(సేల్స్‌ మార్కెటింగ్‌) యద్విందర్‌ సింగ్‌ గులేరియా ఓ ప్రకటనలో తెలిపారు.

"హోండా నుంచి ఇప్పటివరకు ఆరు రకాల బీఎస్‌6 మోడల్‌ ద్విచక్రవాహనాలు మార్కెట్లోకి విడుదలయ్యాయి. వాటిలో యాక్టివా 125, ఎస్‌పీ 125, యాక్టివా 6జీ, షైన్‌, యూనికార్న్‌, డియో మోడళ్లు ఉన్నాయి. బీఎస్‌-6 యుగంలో సంస్థ మరింత దూసుకుపోయేందుకు ఈ మోడళ్లు ఎంతో సహకరిస్తాయి. ఈ ద్విచక్రవాహనాలపై సంస్థ ప్రకటించిన 6 సంవత్సరాల వారెంటీ ప్యాకేజీ కారణంగా వినియోగదారుల నుంచి మంచి స్పందన లభించింది"

- యద్విందర్​ సింగ్​ గులేరియా, హోండా మోటర్స్​ సీనియర్​ వైస్​ ప్రెసిడెంట్​

ఏప్రిల్‌ 1 నుంచి దేశవ్యాప్తంగా బీఎస్‌-6 వాహనాలను అమలు చేయాలని కేంద్ర ప్రభుత్వం నిర్ణయించింది. బీఎస్​-4 వాహనాల విక్రయాలను మార్చి 31లోపు పూర్తి చేయాలని ఆదేశించింది. తదనంతరం వాటి విక్రయాలు, రిజిస్ట్రేషన్​ను నిలిపివేయనున్నట్లు స్పష్టం చేసింది.

ఇదీ చూడండి: 'రిజిస్ట్రేషన్​ చేయించుకోకపోతే... కాలం చెల్లిపోతుంది'