GST Collection in December 2021: వస్తు, సేవల పన్ను (జీఎస్టీ) వసూళ్లు 2021 డిసెంబరులోనూ రూ.లక్ష కోట్ల మార్క్ దాటాయి. జీఎస్టీ ద్వారా గత నెల మొత్తం రూ.1,29,780 కోట్ల ఆదాయం గడించినట్లు కేంద్ర ఆర్థిక శాఖ శనివారం ప్రకటించింది. 2020 డిసెంబరుతో పోల్చితే ఈ మొత్తం 13 శాతం ఎక్కువని పేర్కొంది. జీఎస్టీ వసూళ్లు వరుసగా ఆరు సార్లు రూ.లక్ష కోట్లు దాటాయి అని చెప్పింది.
అయితే.. గతేడాది నవంబరుతో పోలిస్తే డిసెంబరులో జీఎస్టీ వసూళ్లు రూ.1,746 కోట్ల మేర తగ్గాయని కేంద్ర ఆర్థిక శాఖ తెలిపింది. నవంబరులో జీఎస్టీ వసూళ్లు రూ.1,31,526 కోట్లుగా నమోదయ్యాయని చెప్పింది.
వసూళ్లు ఇలా..
- కేంద్ర జీఎస్టీ: రూ.22,578 కోట్లు
- రాష్ట్రాల జీఎస్టీ: రూ.28,658 కోట్లు
- సమీకృత జీఎస్టీ: రూ.69,155 కోట్లు
- సెస్: రూ.9,389 కోట్లు