ఫర్నీచర్​ కొనడం ఇక ఖరీదైన వ్యవహారమే!

దేశీయ ఉత్పత్తులకు ప్రోత్సాహం కల్పించే ఉద్దేశంతో ఫర్నీచర్​ దిగుమతులపై ఆంక్షలు విధించాలని ప్రభుత్వం ఆలోచిస్తోంది. పరిశ్రమలు, అంతర్గత వాణిజ్య అనుబంధ విభాగాలు.. విదేశీ వస్తు దిగుమతుల సూచనల మేరకు కేంద్రం ఈ నిర్ణయం తీసుకునే అవకాశముంది.

ఫర్నీచర్​ దిగుమతులపై ఆంక్షలు విధించే యోచనలో ఉంది కేంద్ర ప్రభుత్వం. దేశీయ ఉత్పత్తులకు ఊతం ఇచ్చేందుకు వీలుగా అనవసర వస్తువుల దిగుమతులను తగ్గించేందుకు చర్చలు జరుగుతున్నట్టు తెలుస్తోంది.

పరిశ్రమలు, అంతర్గత వాణిజ్య అనుబంధ విభాగాలు.. విదేశీ వస్తు దిగుమతులపై నిబంధనలు విధించాలని సూచించాయి. ఈ ఆంక్షలకు సంబంధించి త్వరలో ఆదేశాలు జారీ అయ్యే అవకాశాలు ఉన్నాయని విదేశీ వాణిజ్య డైరెక్టర్​ జనరల్​ తెలిపారు. ఆంక్షలు ఉన్న సరకులకు సంబంధించి దిగుమతిదారుడు లైసెన్స్ లేదా అనుమతి పొందాల్సి ఉంటుందని పేర్కొన్నారు.

చైనా నుంచే అధికం...

2018-19 ఆర్థిక సంవత్సరంలో 603 మిలియన్​ అమెరికన్​ డాలర్ల ఫర్నీచర్​ను భారత్​ దిగుమతి చేసుకుంది. వీటిలో కేవలం చైనా నుంచే 311 మిలియన్​ డాలర్ల వస్తువులు దిగుమతి అయ్యాయి. చైనా తర్వాతి స్థానాల్లో మలేసియా, జర్మనీ, ఇటలీ, సింగపూర్ ​ఉన్నట్లు అధికారిక గణాంకాలు తెలుపుతున్నాయి.

ప్రపంచంలోనే ఫర్నీచర్​ ఎగుమతుల్లో అతి పెద్ద దేశం చైనా. ఏటా భారత్​కు 1 బిలియన్​ డాలర్ల వస్తువులను చైనా ఎగుమతి చేస్తునట్లు తెలుస్తోంది.

ఫర్నీచర్​ రంగంలో భారత్​ చాలా వెనుకపడి ఉంది. ఈ రంగంలో ఉత్పత్తి అసంఘటితంగా ఉండటమే ఇందుకు ముఖ్య కారణం. దేశీయ ఫర్నీచర్​ పరిశ్రమ సుమారు 5 బిలియన్​ డాలర్లకు పైగా ఉత్పత్తి చేస్తోంది. ఈ రంగంలో ఎగుమతులు దాదాపు 1.5 బిలియన్​ డాలర్లుగా ఉన్నాయి.

ఈ నెల మొదట్లో ఇదే విధమైన ఆంక్షలను కేంద్రం విధించింది. మలేసియా నుంచి దిగుమతి అవుతున్న పామాయిల్​పై ఆంక్షలు విధిస్తూ నిర్ణయం తీసుకుంది.

ఇదీ చూడండి: చైనా వస్తువుల దిగుమతులకు ప్రభుత్వ కళ్లెం..!