కరోనా వేళ బడ్జెట్​ కసరత్తులు షురూ

వచ్చే ఆర్థిక సంవత్సరానికి బడ్జెట్ రూపొందించే కసరత్తును ఆర్థిక శాఖ ప్రారంభించింది. ఆర్థిక సేవల విభాగం, ఎంఎస్​ఎంఈ మంత్రిత్వ శాఖ, హౌసింగ్, స్టీల్, పవర్ తదితర శాఖలకు చెందిన అధికారులు ఈరోజు సమావేశంలో పాల్గొన్నారు. నవంబర్ 12 వరకు బడ్జెట్ తయారీ సమావేశాలు కొనసాగనున్నాయి.

2021-22 సంవత్సరానికి బడ్జెట్ తయారీ ప్రక్రియను ఆర్థిక శాఖ లాంఛనంగా ప్రారంభించింది. కరోనాతో దేశ ఆర్థిక వ్యవస్థ కుదేలైన వేళ రూపుదిద్దుకుంటోన్న ఈ బడ్జెట్​పై సర్వత్రా ఆసక్తి నెలకొంది. మహమ్మారి తీవ్రతకు రెవెన్యూ వసూళ్లు, వ్యయాలు, ఎగుమతులు, పెట్టుబడుల ఉపసంహరణపై తీవ్ర ప్రభావం చూపించిన నేపథ్యంలో ప్రవేశపెట్టనున్న ఈ బడ్జెట్ దేశ ఆర్థిక వ్యవస్థకు కీలకం కానుంది.

అంతర్జాతీయ ద్రవ్య నిధి సంస్థ అంచనాల ప్రకారం భారత ఆర్థిక వ్యవస్థ ఈ ఆర్థిక సంవత్సరం 10.3 శాతం మేర పతనం కానుంది. భారత ఆర్థిక వ్యవస్థ 9.5 శాతం క్షీణిస్తుందని ఆర్​బీఐ సైతం అంచనాలు వెలువరించింది. అన్ని ప్రతికూలతల నడుమ ఈ బడ్జెట్​ తయారవుతోంది.

నెల రోజుల పాటు..

బడ్జెట్​లో భాగంగా.. వచ్చే ఆర్థిక సంవత్సరానికి ముందస్తు అంచనాలతో పాటు 2020-21 సంవత్సరానికి సవరించిన జాబితాను తయారు చేయాల్సి ఉంటుంది. ఆర్థిక శాఖ షెడ్యూల్ ప్రకారం.. వీటిని తయారు చేసేందుకు దాదాపు నెల రోజుల సమయం పట్టనుంది.

బడ్జెట్ తయారీకి శుక్రవారం ప్రారంభమైన ఈ సమావేశాలు నవంబర్ 12 వరకు కొనసాగనున్నాయి. ఆర్థిక శాఖకు చెందిన ఆర్థిక సేవల విభాగం, ఎంఎస్​ఎంఈ మంత్రిత్వ శాఖ, హౌసింగ్, స్టీల్, పవర్ తదితర శాఖలకు చెందిన అధికారులు ఈరోజు సమావేశంలో పాల్గొన్నారు.

మోదీ రెండో హయాంలో, నిర్మలా సీతారామన్ ప్రవేశపెట్టనున్న మూడో పద్దు ఇది. ఫిబ్రవరి 1న బడ్జెట్ పార్లమెంట్ ముందుకు రానుంది.