ఉల్లి ఎగుమతులపై నిషేధం ఎత్తివేత యోచనలో కేంద్రం!

ఉల్లి ఎగుమతులపై ఉన్న నిషేధాన్ని ఎత్తివేసే ఆలోచనలో కేంద్రం ఉన్నట్టు తెలుస్తోంది. కొన్ని నెలలుగా ఆకాశాన్నంటిన ఉల్లి ధరలు క్రమంగా తగ్గుముఖం పడుతుండటమే ఇందుకు కారణం.

ఉల్లి ధరలు ఆకాశాన్నంటి కొన్ని నెలలుగా ప్రజలను కన్నీళ్లు పెట్టిస్తున్నాయి. అయితే కేంద్ర ప్రభుత్వం చేపట్టిన చర్యలతో తాజాగా ఉల్లి ధరలు తగ్గుముఖం పట్టాయి. ఈ నేపథ్యంలో ఉల్లి ఎగుమతులపై ఉన్న నిషేధాన్ని ఎత్తివేయాలన్న నిర్ణయాన్ని ప్రభుత్వం పరిశీలిస్తున్నట్టు తెలుస్తోంది.

తాజా పంట మార్కెట్లోకి...

టర్కీ వంటి దేశాల నుంచి ఉల్లిని దిగుమతి చేసుకోవడం వల్ల ధరలు తగ్గాయి. వీటికి తోడు తాజా పంట మార్కెట్లోకి చేరుతోంది. ఫలితంగా నెల రోజుల ముందు రూ.160గా ఉన్న కేజీ ఉల్లి ధర.. ఇప్పుడు రూ. 60-70కి చేరింది. అయితే నాణ్యత ఆధారంగా ఆయా ప్రాంతాల్లో ఉల్లి ధరలు తగ్గుతున్నాయి.

"తాజా పంట అందుబాటులోకి రావడం వల్ల ఉల్లి ఎగుమతులపై ఉన్న నిషేధాన్ని ఎత్తివేయాల్సిన అవసరం ఉంది"

-- ప్రభుత్వ అధికారి.

దేశీయ విపణుల్లో ఉల్లిగడ్డ అందుబాటులో ఉంచేందుకు 2019 సెప్టెంబరు నెలలో ఎగుమతులపై నిషేధం విధించింది ప్రభుత్వం. దీనితో పాటు రిటైల్​ వ్యాపారుల వద్ద నిల్వల సామర్థ్యంపై పరిమితులు విధించింది.

ఎందుకు పెరిగింది?

ఉల్లి ధర ప్రభావం దేశ రాజధాని దిల్లీ నుంచి గల్లీ వరకు తాకింది. దేశంలో రుతుపవనాలు ఆలస్యమవడం.. ఉల్లి ఎక్కువగా పండే ప్రాంతాల్లో సరైన సమయానికి వర్షాలు కురవకపోవడమే ధరల పెరుగుదలకు ప్రధాన కారణం. ఫలితంగా 2018-19తో పోలిస్తే 2019-20 సంవత్సరం ఖరీఫ్​ సిజన్​లో అంచనా కంటే పంట దిగుబడి 25శాతం తగ్గిపోయింది.

ఇదీ చూడండి: శాంసంగ్​ గెలాక్సీ నుంచి కొత్త ​ఫోన్​.. ధరెంతంటే?