టీకా ఎగుమతి, దిగుమతిపై పరిమితుల్లేవ్!

కరోనా టీకా ఎగుమతులు, దిగుమతులపై పరిమితులు ఉండకుండా కేంద్రం నిబంధనలను సవరించింది. వ్యాక్సిన్ సరఫరా వేగవంతంగా జరిగేలా ఈ నిర్ణయం తీసుకున్నట్లు తెలిపింది. వ్యాక్సిన్లను తరలించే కంటైనర్లను సైతం ఆంక్షల నుంచి మినహాయించింది.

కరోనా వ్యాక్సిన్ ఎగుమతులు, దిగుమతులపై ఎలాంటి పరిమితులు ఉండవని ప్రభుత్వం ప్రకటించింది. ఎలాంటి పరిమితులు(వ్యాల్యూ లిమిటేషన్) లేకుండానే వీటిని ఎగుమతి, దిగుమతి చేసుకునేందుకు అనుమతించింది. కొరియర్ ద్వారా వ్యాక్సిన్ సరఫరా వేగవంతంగా జరిగేలా ఈ మేరకు నిర్ణయం తీసుకుంది. ఇందుకు సంబంధించి 'కొరియర్ ఇంపోర్ట్స్ అండ్ ఎక్స్​పోర్ట్స్​(ఎలక్ట్రానిక్ డిక్లెరేషన్ అండ్ ప్రాసెసింగ్) నిబంధన'లను కేంద్ర పరోక్ష పన్నులు, కస్టమ్స్ బోర్డు సవరించింది.

"కొవిడ్-19కి సంబంధించిన వ్యాక్సిన్ల ఎగుమతులు, దిగుమతులకు వ్యాల్యూ లిమిటేషన్ లేకుండానే అనుమతులు లభిస్తాయి. టీకాలు తక్కువ ఉష్ణోగ్రత వద్ద నిల్వ చేయాల్సిన అవసరం ఉండటం, పంపిణీలో ఎక్కువ దశలు ఉండటం వల్ల ఎదురయ్యే సవాళ్లను దృష్టిలో ఉంచుకొని.. ఈ నిర్ణయం తీసుకున్నాం. వ్యాక్సిన్లను త్వరగా తరలించడానికి సమర్థమైన విధానాలను అమలు చేయడం అవసరం."

-సీబీఐసీ ప్రకటన

టీకాలను శీతల కంటైనర్లలో తరలించనున్న నేపథ్యంలో వాటి ఎగుమతులు, దిగుమతులకు కూడా మినహాయింపులు ఇస్తున్నట్లు సీబీఐసీ ప్రకటన స్పష్టం చేసింది. ఎగుమతి, దిగుమతి సమయంలో ఆ కంటైనర్ల వివరాలు తెలిపేలా సమాచారం అందించాలని పేర్కొంది. అదే సమయంలో, వ్యాక్సిన్ల క్లియరెన్స్ కోసం 'అదనపు కస్టమ్స్ ర్యాంక్ అధికారి' నేతృత్వంలో టాస్క్​ఫోర్స్ ఏర్పాటు చేయనున్నట్లు తెలిపింది.

ఇదీ చదవండి:టీకా అనుమతులపై నిపుణుల కమిటీ భేటీ