బాలల దినోత్సవాన్ని పురస్కరించుకుని భారత చిన్నారులకు డూడుల్ పోటీలు నిర్వహిస్తున్నట్లు గూగుల్ ప్రకటించింది. విజేతకు రూ.5 లక్షల ఉపకారవేతనం అందిస్తామని తెలిపింది. అంతేకాక ఆ విద్యార్థి చదువుతున్న పాఠశాలకు లేదా లాభాపేక్షలేని సంస్థకు రూ.2 లక్షల విలువైన సాంకేతిక ప్యాకేజీతో పాటు మరిన్ని బహుమతులూ అందించనుంది గూగుల్.
"'నేను పెద్దయ్యాక, ఎలా ఉండాలంటే' అనే నేపథ్యంతో డూడుల్స్ రూపొందించాలి. ఇందులో కచ్చితంగా 'G-O-O-G-L-E' (గూగుల్) అనే అక్షరాలు ఉండాలి. ఎంపికైన డూడుల్ నవంబర్ 14న గూగుల్ సెర్చ్ ఇంజన్ www.google.co.in లో కనిపిస్తుంది. రూ.5 లక్షల బహుమతి అందుతుంది."
- సప్నా చందా, డైరెక్టర్ ఆఫ్ మార్కెటింగ్, ఆసియా అండ్ ఇండియా, గూగుల్
చందమామపై జీవితం నుంచి కాలుష్యరహిత ప్రపంచం వరకు, అలాగే మేఘాల నుంచి అంతరించిపోతున్న జంతువులతో నిండిన స్వర్గధామం వరకు దేన్నైనా చిన్నారులు చిత్రించవచ్చు. చిన్నారులు తమ ఊహలకు అనుగుణంగా సృజనాత్మకంగా స్కెచ్లు లేదా పెయింటింగ్స్ గీయవచ్చు.
చిన్నారి కళాకారులు... క్రేయాన్స్, వాటర్ కలర్స్, గ్రాఫిక్ డిజైన్ ఉపయోగించి డూడుల్స్ రూపొందించవచ్చు. మట్టితోనూ డూడుల్స్ తయారు చేయవచ్చు. వీటిని ఆగష్టు 1 నుంచి సెప్టెంబర్ 30 సాయంత్రం 10 గంటలలోపు గూగుల్ వెబ్సైట్లో అప్లోడ్ చేయాలి.
20 ఉత్తమ డూడుల్స్ను జ్యూరీ నిర్ణయిస్తుంది. వీటిని అక్టోబర్ 21 నుంచి నవంబర్ 6 వరకు బహిరంగ ఓటింగ్ కోసం ఉంచుతారు. ఓటింగ్లో ప్రథమస్థానంలో నిలిచినవారిని విజేతగా ప్రకటిస్తారు.
ఇదీ చూడండి: కొనసాగుతున్న స్టాక్ మార్కెట్ నష్టాల పరంపర
