వాటిపై జీఎస్​టీ మినహాయింపునకు కేంద్ర బృందం ఏర్పాటు!

కొవిడ్ టీకాలు, ఔషధాలు వంటి వాటిపై​ జీఎస్​టీ మినహాయింపు లేదా తగ్గింపుపై సమీక్షించేందుకు మంత్రుల బృందాన్ని ఏర్పాటు చేసింది కేంద్రం. జీఎస్​టీ మినహాయింపుపై 8 మంది మత్రులతో కూడిన ఈ బృందం అధ్యయనం చేసి నివేదిక సమర్పించనుంది.

కొవిడ్​ సంక్షోభం వేళ టీకాలు, ఔషధాలు, ఇతర సామగ్రిపై జీఎస్​టీ(GST) తగ్గించాలని దేశవ్యాప్తంగా వినతులు వస్తున్న క్రమంలో ఈ అంశంపై సమీక్షించేందుకు మంత్రులతో బృందాన్ని ఏర్పాటు చేసింది కేంద్రం. మేఘాలయ ముఖ్యమంత్రి కాన్రాడ్ సంగ్మా నేతృత్వంలో 8 మంది మంత్రులు ఇందులో సభ్యులుగా ఉన్నారు.

టీకాలు(VACCINES), కొవిడ్​ సంబంధిత సామగ్రి, ఇతర అవసరాలపై జీఎస్​టీ మినహాయింపు లేదా తగ్గించే విషయంపై ఈ బృందం అధ్యయనం చేయనుందని కేంద్ర ఆర్థిక శాఖ తెలిపింది. జూన్​ 8 లోపు మంత్రుల బృందం నివేదిక సమర్పిస్తుందని, ఆ తర్వాత తుది నిర్ణయం తీసుకోనున్నట్లు పేర్కొంది.

జీఎస్​టీ కౌన్సిల్ 43వ భేటీలోనే టీకాలపై పన్ను మినాహాయింపు ఇస్తారని అందరూ భావించినా ఏకాభిప్రాయం కుదరక ఎలాంటి నిర్ణయం తీసుకోలేదు. ఈ విషయంపై అధ్యయనానికి మంత్రుల బృందం ఏర్పాటు చేయాలని నిర్ణయం తీసుకుంది. ఈ బృందంలో తెలంగాణ మంత్రి హరీష్​ రావ్​ కూడా సభ్యులుగా ఉన్నారు.

ఇదీ చదవండి:Remdesivir: 'రాష్ట్రాలే సొంతంగా కొనుక్కోవాలి!'