మనుషుల ప్రాణాలతోనే కాదు.. మదుపర్ల సంపదతోనూ కరోనా వైరస్ చెలగాటమాడుతోంది. తన ఉనికిని ఊడలా మర్రిలా విస్తరించుకుంటూ పోతోంది. ఈ క్రమంలో దొరికిన సంపదనంతా దోచుకుంటోంది. అంతర్జాతీయంగా బుధవారం ఒక్కరోజే రూ.800లక్షల కోట్ల సంపదను ఆవిరి చేసిన ఈ మహమ్మారి తన ప్రతాపాన్ని ఇంకా ఉద్ధృతం చేస్తోంది.
వైరస్ ధాటికి ఆసియా మార్కెట్లు శుక్రవారం భారీ పతనాన్ని చవిచూస్తున్నాయి. సురక్షితంగా భావించే బంగారం, బాండ్ల షేర్లూ నేలచూపులు చూస్తున్నాయి. ఆస్ట్రేలియా మార్కెట్లు దాదాపు 7శాతం మేర కుంగాయి. న్యూజిలాండ్‌ సూచీలు చరిత్రలోనే అత్యధిక ఇంట్రాడే నష్టాల్ని నమోదు చేశాయి. జపాన్‌కు చెందిన నిక్కీ 10 శాతం, కొరియా కోస్డాక్‌ 8 శాతం పడిపోవడం వల్ల 20 నిమిషాల పాటు ట్రేడింగ్‌ను నిలిపివేశారు. అమెరికా మార్కెట్లు భారీ స్థాయిలో పతనం కావడం ఆసియా మార్కెట్లపై భారీ ప్రభావం చూపాయి.