కరోనా అనంతరం భారత ఆర్థిక వ్యవస్థ క్రమంగా రికవరీ బాట పడుతోందన్న సంకేతాలు కనిపిస్తున్నాయి. సెప్టెంబరు 2021లో మొత్తం ఉద్యోగాలు 85 లక్షలు పెరగడంతో నిరుద్యోగ రేటు 6.9 శాతానికి పరిమితమైంది. కరోనా ప్రారంభంలో అంటే మార్చి 2020న ఇది 20 శాతంగా ఉంది. ఈ ఏడాది ఆగస్టులో 8.3 శాతంగా ఉన్న నిరుద్యోగ రేటు సెప్టెంబరులో మరింత తగ్గడం విశేషం. సెంటర్‌ ఫర్‌ మానిటరింగ్‌ ఇండియన్‌ ఎకానమీ(సీఎమ్‌ఐఈ) విడుదల చేసిన నెలవారీ గణాంకాల ప్రకారం.. కరోనాకు ముందునాటి ఫిబ్రవరి 2020 తర్వాత అత్యుత్తమ ఉద్యోగ గణాంకాలు ఇవే.
- సెప్టెంబరులో వేతన ఉద్యోగాలు ఆగస్టుతో పోలిస్తే 70 లక్షలు పెరిగి, మొత్తం ఉద్యోగాలు 7.71 కోట్ల నుంచి 8.41 కోట్లకు చేరాయి. 2019-20 సగటు 8.67 కోట్ల వేతన ఉద్యోగాలు కావడం గమనార్హం.
- సెప్టెంబరులో రైతుల సంఖ్య 25.1 లక్షలు తగ్గి 11.36 కోట్లకు పరిమితమైంది. ఆగస్టులో వీరి సంఖ్య 11.6 కోట్లుగా ఉంది. గ్రామీణ, పట్టణ ప్రాంతాల్లోని వారు వ్యవసాయేతర ఉపాధికి వెళ్లడం ఇందుకు నేపథ్యం.
- చిన్న వ్యాపారాలు, రోజు కూలీ కార్యకలాపాలు ఆగస్టుతో పోలిస్తే సెప్టెంబరులో 12.85 కోట్ల నుంచి 13.40 కోట్లకు చేరాయి.
- గత నెలలో సంఘటిత, అసంఘటిత తయారీ రంగ ఉద్యోగాలు 29 లక్షల మేర పెరిగాయి. ఆహార పరిశ్రమ(25 లక్షలు), లోహ(15 లక్షలు) రంగాల్లోనూ ఎక్కువ ఉద్యోగాలే జత అయ్యాయి. ఫార్మా, పాద రక్షలు, రత్నాభరాణాలు, చేతివృత్తులలోనూ ఎంచదగ్గ రీతిలోనే ఉద్యోగాలు వృద్ధి చెందాయి.