రష్యాకు చెందిన ఒకే డోసు కొవిడ్‌-19 టీకా, 'స్పుత్నిక్ లైట్'ను దేశీయంగా అందుబాటులోకి తెచ్చేందుకు డాక్టర్ రెడ్డీస్ లేబొరేటరీస్‌ సన్నద్ధమవుతోంది. దీనిపై మనదేశంలో క్లినికల్ పరీక్షలు నిర్వహించనుంది. ఈ అంశంపై భారత ఔషధ నియంత్రణ మండలి(డీసీజీఐ)తో సంప్రదింపులు సాగిస్తున్నామని డాక్టర్ రెడ్డీస్ లేబొరేటరీస్‌ సీఈఓ (ఏపీఐ, సర్వీసెస్‌) దీపక్ సప్ర వెల్లడించారు.
"స్పుత్నిక్ లైట్‌కు ఇప్పటికే 15 దేశాల్లో అనుమతి లభించింది. దీనిపై రష్యాలో పెద్దఎత్తున క్లినికల్ పరీక్షలు జరిగాయి. ఆ సమాచారాన్ని డీసీజీఐకి అందజేశాం. మనదేశంలోనూ రెండు- మూడు నెలల్లో పరీక్షలు నిర్వహించేందుకు సిద్ధంగా ఉన్నాం."
-దీపక్ సప్ర, డాక్టర్ రెడ్డీస్ లేబొరేటరీస్‌ సీఈఓ
సెప్టెంబరు నుంచి లభ్యత పెంపు
రెండు డోసుల 'స్పుత్నిక్ వి' టీకా లభ్యత ఈ ఏడాది సెప్టెంబరు నుంచి బాగా పెరుగుతుందని దీపక్ సప్ర పేర్కొన్నారు. 'రష్యా నుంచి 10 కోట్ల డోసుల టీకా దిగుమతి కానుంది. దేశీయంగా ఈ టీకా ఉత్పత్తి మొదలవుతోంది. దీనివల్ల లభ్యత బాగా పెరుగుతుంది' అని వివరించారు.