Digital Transactions Reimbursemen: యూపీఐ, డెబిట్ కార్డుల లావాదేవీలపై ఛార్జీలు భరిస్తున్న వారికి ఊరట కలిగించేలా కేంద్రం కీలక నిర్ణయం తీసుకుంది. ఛార్జీల రిఫండ్ కోసం రూ.1300 కోట్లను కేటాయిస్తున్నట్లు బుధవారం ప్రకటించింది. డిజిటల్ చెల్లింపులు చేసే దిశగా ప్రజలను ప్రోత్సహించేందుకే కేంద్ర మంత్రివర్గం ఈ నిర్ణయం తీసుకున్నట్లు ఐటీ శాఖ మంత్రి అశ్వినీ వైష్ణవ్ వెల్లడించారు. వచ్చే ఏడాది నుంచి ఈ పథకం అమలులోకి రానున్నట్లు స్పష్టం చేశారు.
భీమ్-యూపీఐ, రూపే డెబిట్ కార్డుల ద్వారా రూ.2000లోపు ఆన్లైన్ చెల్లింపులు చేసినవారికి ఈ స్కీమ్ వర్తిస్తుంది. అయితే ఇది ఈ ఏడాది ఏప్రిల్ 1వ తేదీ నుంచి ఇప్పటివరకు చెల్లింపులు చేసిన వారికే వర్తిస్తుంది.
ఈ స్కీమ్ ప్రకారం సంబంధింత బ్యాంకులకు వసూలైన ఛార్జీల మొత్తాన్ని చెల్లిస్తామని కేంద్రం ప్రకటనలో పేర్కొంది.
Semiconductor Manufacturing: ఉత్పత్తి ఆధారిత ప్రోత్సాహక పథకం(పీఎల్ఐ) కింద దేశంలో సెమీకండక్టర్-డిస్ప్లే బోర్డ్ ఉత్పత్తి చేసే సంస్థలకు కేంద్రం భారీగా ప్రోత్సాహకం అందించనుంది. ఇందుకోసం రానున్న 5-6 ఏళ్లకు రూ.76వేల కోట్లను కేటాయిస్తున్నట్లు కేంద్ర మంత్రి అనురాగ్ ఠాకూర్ బుధవారం కేబినెట్ సమావేశం అనంతరం వెల్లడించారు. సెమీకండక్టర్ మిషన్లో భాగంగా కేంద్రం ఈ నిర్ణయం తీసుకున్నట్లు పేర్కొన్నారు. ఈ నిర్ణయం.. మైక్రోచిప్స్ టెస్టింగ్, ప్యాకింగ్, డిజైన్ తదితర విభాగాల్లో కీలక పాత్ర పోషిస్తుందన్నారు టెలికాం, ఐటీ శాఖ మంత్రి అశ్వినీ వైష్ణవ్.
ఇదీ చూడండి :అంచెలంచెలుగా ఎదిగి.. ఇప్పుడు 'షునెల్' సీఈఓగా భారతీయురాలు
